ESRA DAL / MA/AMED
Welatîyê ke taxê Alîpaşa û Lalebey de cuyenî herçiqas ke keyeyê înan ame rijnayîş, reyna zî ê taxe nêteriknenî. Bitaybetî keyeyê ke Taxa Alîpaşa de herêma rijnayîşî ya yewin de manenî, Sûr nêteriknenî, taxanê dormeyî de bica benî.
Nê keyeyan ra yewe zî keyeyê Aynur Guneşa 60 serreyî yo. Babete ser o Guneşe qisey kerde.
Guneşe va ‘ez nêşena ziqaqê ke vengê domanan û cinîyan tede esto ra fek vera bida’ û wina dewam kerde: “Heta nika ez qet nêvejîyaya teberê Sûrî. Ez ciwanîya xo ra nata tîya de ya. Ez nêşena sewbîna cayêkî de bicuya. Wexto ke par mêrdeyê mi merd, ez zaf etirîyaybîya; mi vatêne ez do se bikera? Labelê mi xo bi xo vatêne keye û cîranê mi estî. Mi nêzanayêne ke felaketêko winasî paweyê min o.”
Ti keye sey Sûrî nêbeno
Guneşe dewamê qiseykerdişê xo de va ‘qet domanê mi çinêbî, labelê bi domanê Sûrî hewenîya mi ameyêne’ û wina domnaye: “Rijnayîşî ra dima cuya ma xira bîye. Kurdî de zewtêkî esto vano ‘wa keyeyê to birijîyo’, şarê Sûrî zî nêyî cuya. Ma kamî rê se kerd ke ma nêyî cuyenî. Ez her roje şona enkazê keyeyê xo yo rijîyaye temaşe kena. Ez nêşena daîreyan de bicuya. Ti keye sey Sûrî nêbeno.”