Koyê Omeryanî ke bajarê Mêrdînî de yî, her serre bi mehneyê ‘pêrodayîş esto’ yenî veşnayene, emser zî ameyî veşnayene. 3 rojî verê pêrodayîşan ra dima şewat vejîyabi û şewat hîna zî dewam keno. Leşkerî destûr nêdanî ke şewat bêro hewnakerdene.
Ame musayene ke şewat resayo dewanê ke rayîrê Nisêbîn û Mêrdînî ser o de yî. Seke yeno zanayene şewat ewil dewanê Taletê, Serêkanîyê û Çalê de dest pêkerdbi û heta nika bi seyan darî bîyî wel. Dewa Serêkanîyê ra Yildiz Yildirime daye zanayene ke ê serranê 90î ra nata hertim bin zextan de yî û wina domnaye: “Labelê ma erdê xo nêterikna. Ma 94 de veşnayîşê dewan ver mecbûr mendî ke şêrî Îzmîr, labelê ma tepîya agêrayî.”
Yildirime dîyar kerde ke koyê tîya her serre yenî veşnayene û wina dewam kerde: “Her serre nê darî benî wel, labelê serrêna ti ewnîyenî ke ha reyna bîyî keske. Ko û darê tîya zî zaf rikin î. Ê wazenî ma zî çin bikerî, labelê reyê ma tîya de yî. Ê se bikerî zî do wina dewam bikero. Ne eşkenî ma û ne zî daranê ma tîya ra cîya bikerî.”
JINNEWS/MÊRDÎN