Şarê kurd serra 2015î, bi şer û pêrodayîşan xelisna. Serra 2015î seweta şarê ma çendîn çetin bivîyaro zî destvistenanê aye zî henday gird û nirxdar bî. Kobanê ra heyanî Şengalî, Girê Sipî ra heyanî Cizîra Botan, Hesekê ra heyanî Sûrê Amedî û her çar dormeyê Kurdistanî de xoverdayîş estbi. Nika aseno ke serra 2016î zî do bi xoverdayîş û herbî bivîyaro. Yeno vaten ke ameyîşê pançşemî, çarşeme ra aseno! Qarakterê 2016î bi biyayişanê serra par ra dîyar o.
Exlaqê dişmenî çinyo
Enka Vakurê Kurdistanî de herbekê zaf gird qewimîyeno. Çeteyê AKP sûk û şarçeyanê welatî tepişto û hergu roj bi tanq û topan bombe varnenê ser serreyê şarê ma ra. Her roj bi desan doman, ciwan, cenî, kal û pîranê ma bi hawayêde hovane kişenê. Bêguman minetê şerî çin o! Quwetanê duştê pê, şeran de pê kişenê; xozayê şeran ana yo. Labelê ganî yew exlaqê şer û pêrodayîşan zî bibo. Çîyo ke zerrîya ma tewr vêşî dejneno oyo ke yew exlaqê dişmenê ma çin o. Teyna seweta şerî nê, na çî seweta heme mijaran ravêreno. Duştê ma de quwetêde ana kewte esto ke; ne şeran de, ne sîyasetî de ne cuyê komelî de exlaqî şinasneno! Heme maharetê êyî xapênayîş, fen, fût û qomplo yo.
Ewro Kurdistano Vakurî de şerê xendekan rayîra şino. Quwetê YPS Cizîr, Silopî, Sûr, Kerboran, Nisêbîn, Farqîn û xeylê cayanê bîn ê Kurdistanî de seweta azadîya şaran xover danê. Çeteyê AKP bi heme îmkanê dewletî gala kenê; la bi aşman o nêşkenê yew game zî avera bişirê. Henday ke çapemenî de yeno vatiş, dewleta dagirker bi seyan tanq û top bi hezaran polîs, bi des hezaran leşker eşrawito Cizîra Botan. Hûmarê qontrayan zî nêyeno zanitiş. Şarçeyanê bîn ê Kurdistanî de zî rewş ana ya. Hewa ra bi helîqopteran, erd ra zî bi tifinganê gird û giranan sûk û şarçeyanê welatê ma xilnenê. Rûxmî teknîka henday avera, polîs û leşkeranê tirkî nêşkenê bi şerwananê YPS reyde şer bikerê. Durî ra tanq û top erzenê, hewa ra danê piro; la nêwetanê xendekan bivîyarê û bidekewê mîyanê papolan. Dema YPS ra derb wenê zî verê xo danê şarê sivîl û domanan kişenê. Hukmê dewleta tirk a ke her tim pesnê ci danê no yo; teyna eşkenê domanan bikişê û kêyanê şarê bixilnê! Ma weş zanê ke, herbê xendekan seweta şaran yeno dayîş. Raşteya no şerî ganî raşt bêro famkerdiş.
Erdogan wazeno bibo xelîfe
No herb verê heme çî duştê faşîzmî de yeno dayîş. Serokkomarê Tirk Tayyîp Erdogan bi hawayêde akerde vat ke o wazeno Tirkîya de sîstema Hîtlerî awan bikero. Hîtler, vîrdozîya faşîzmî temsîl keno û seweta afirnayîşê ‘Nîjada Arî’ hemeyê Awrûpa veşna û ûca de kerra kerrayî ser (sî, ser sî) de nêverada. R.Tayyîp Erdogan zî wazeno bi vîrdozîya ‘Tirk-îslam’î hemeyê Rojhelato Mîyanên biveşno; xora veşnayo zî. Ewro endî tam ameyo vînayîş ke armancê R. Tayyîp Erdogan’î awankerdişê faşîzmê Rojhelato Mîyanên o. Seweta êyî wazeno bibo ‘Serok’. Yanê wazeno bîbo ‘xelîfe’. Pergala Serokeyî seweta nêwî wazeno. Sîyaseta zerrî de xora sey padîşah û xelîfeya lebetêyêno, la no pozîsyonê fîîlî seweta awankerdişê faşîzmê Rojhelato Mîyanên qîm nêkeno. No şer şerê xetan o. Xeta R.Tayyîp Erdogan duştê xeta Rayber Apoyî ame avera berdiş.
Wazenê mezgê şarî têmîyan bikerê
Zey ke yeno zanayiş, Rayber Apo wazeno bi rayîra xeta xoserîya demokratîk, heme Rojhelato Mîyanên de birateya şaran û aştî vila bikero. Tayyîp Erdogan zî wazeno bi xeta Hîtlerî faşîzmî vila bikero. No herb, herbê xetan o; aye yewin ser bikewo se, hemeyê şaran rê azadî; ê diyîn ser bikewo se hemeyê şaran rê merg ano! Tayîn dormeyî nêwazenê taybetmendeya na prosesî raşt fehm bikerê û vanê ‘PKK çirê xendekan kinito û şerî ard mîyanê sûkan?’ No fek, fekê AKP yo. Ê wazenê vatenanê ana mezgê şarê ma têmîyan bikerê. Sebebê pêrodayîşan xendekî nîyê; xendekî nêbîyayênê zî AKP do galayê şarî bikerdayê. Kinitişê xendekan dijwarîya galayan şikit û polîtîkayê AKP pûç kerd. Taybetmendîyêde bîn ê na şerî zî zelalkerdişê qadro û şarî yo. No çend serriyo, qada ma ya legal û komelî de oportunîzm û lîberalîzm aver şibi. Na xeta çîna mîyanên a munafiq do bi şerê xendekan de bêro vîyarnayîş.
KENAN AVCI/GIROTXANEYÊ SÊWEREG