Derbeya Seray
KCK aşkere kerd ke na hewldayen Tirkîye de nêbîyayişê demokrasî damûsnena û vist vîrî ke herb û hewldayenê winayî welatê ke demokrasî çinyo de benê. Hemserokîna Konseya Rayverîn yê KCK hayr ant derbeya sivîl ser û wina va: “Verîya 1 serr Tayyîp Erdogan, Gladyoyê Seray MHP û pêrokîn faşîstan, Ergenekon û tayî quwetanê lejkerî girot xo het û dûştê netîceyanê weçîntayişanê 7ê Hezîran de derbe viraşt. Dûştê îradeyê şarî derbeya Serayî virazîya. Rîwalê têkberdişê Hereketê Serbestîyê Kurd bi artêş û pêrokîn faşîstan ra îtifaq virazîya. Erdoganî artêş kirêşt sûkanê kurdan ser, her ca veşna û sivîlan qetil kerd. Rîwalo ke artêş nê sûcan ra nîro mahkeme kerden qanûnî amey vetiş.”
Werte de îxtidareke demokratîk çinya
KCK da zonayen ke dûştê klîkê lejkerî klîkeyê lejkerî ya newî derbe viraşto û wina va: “Badê na hewldayen zey ‘demokrat’ damûsnayişê Erdoganî, Gladyoyê Seray û îxtidara faşîstîn yê AKP şaş û talokeyî yo. Nê qewmyayişan zey pirodayişê mavêna quwetanê demokratîk û derbekaran de damûsnayiş şaş o û meşrûkerdişê derbekaran o. Tirkîye de ne îxtidareke sivîl ya demokratîk esta, ne zî dûştê nayî de tekoşîneke demokrasî. Werte de pirodayişê îxtidar yê dişmenanê demokrasî û kurdan esto.”
Dûştê AKP tekoşîn sist nêviradîyo
Hemserokîna Konseya Rayverîn yê KCK aşkere kerd ke eke werte de dûştê demokrasî derbeyekê esta se, nayî sifte faşîst AKP viraşta. KCK va îxtidara AKP bi xo Tirkîye kirêşena pirodayişan mîyan. KCK vist vîrî ke dûştê faşîzmê AKP ganî tekoşîn sist nêbo û bi nê vatişan veng da çormeyanê demokratîk: “Ganî çormeyê demokratîk destûr nêdê ke qerakterê faşîstîn yê AKP bin maskeyê demokrasî de bîro nimiten û îtifaqê demokratîk bîro ronayen.”
KCK aşkere kerd ke ganî dûştê AKP de tekoşînê demokrasî bîro berzkerden û raya Tirkîyeya demokratîk bîro akerden.
ANF/BEHDÎNAN