Nezdîyê jû serrî yo Tirkîye de pirodayiş û merdişî nêqedîyayî. Dej û janê pîlî zî mayî ancenê. Nika zî Şirnex, Gever û Nisêbîn de dayikê kurd, Roja Mayan bin bombevornayenan de pêşwazî kerdî. Dayikê ke tayê ci domanê xo vindî kerdî, domanê tayênan zî mewzîyanê xoverdayişî de yê û yê tayînan kî cenazeyê domananê ci hewna kuçeyan de yê aşkere kenê ke, no welatî de hinî maneyê Roja Dayikan nêmenda.
Erdogan’î herb vet
Qezaya Mêrdîn Nisêbîn de ke ablûqe û terorê dewlet roja 58. de rameno de dayikê kurd vera serdestî xover danê. Dayika Halime ke 55 serrî ya dana zonayen ke wexto ke domanê înan nêbê ciwiyayîs serva înan zey zîndanî yo û wina dewam kerd: “Nika zî bi desan cenazeyî werteyê kuçeyan de yê, ma nêşkeme bigîrê. Kamcî domanê ma yo, ma ey zî nêzanê. Wa Roja Dayikan ya winayî nêbo û herb ramitoxan rê nêrazîbiyen damusna.
Dayika Helîme Reîscûmhûr Erdogan’î rê nêrazîbiyen damusna û wina va: “Erdogan’î herbî teşwîq kerd. Rîwalê ey gencî, domanî mirenê. Dayikê tirk wa domananê xo nêrişê herb. No herbê welatî nîyo, herbê îstîla yo.”
Hesap do bîro persayiş
Jû maya ke bin bombevornayenan de xover dana Hedîye Acar a 60 serrî ya. Dayika Hedîye da zonayen ke wazenê ma bi dejê domanan terbîye bikerê û vist vîrî ke tarîx nê rojan nuşeno, tornê ma dê hesabê nînan rojeke perskerê. Dayika Hedîye rîwalê herbî Erdogan’î rê nêrazîbiyen damusna û wina va: “Eke Erdogan’î tayî qedr dabi dayikan, do wina herb nêvetibe. Wa bombeyê ke her roj erzeno dayikan ser xo vîr ra nêkero, çike ma dê xo vîr ra nêkerê. Ma dê nê dejan nêerzê zerreyê xo, hinî kurdê verên çinyê, ma dê rojekê hesabê nînan pers bikerê.
Domananê Nisêbîn zî aşkere kerdî ke, rîwalê bombevornayen, welişnayiş û rijnayişê dikanan înan nêeşkîya mayanê xo rê xelat bigîrê.
DÎHA/MÊRDÎN