Xeberanê sazgehanê çapemenî yê dinya de hayr ancîya serkewtişanê QSD û peycoy destpa kerdişê herekatê dewleta tirk ser. Pêrokîn çapemenî zey sebebê herekatê îşgalî hayr antî stratejîya manîkerdişê bîyayişê kurdan ser.
‘Derdê Enqera ronayişê heremê otonom yê kurdan o’
Qenala televîzyon yê Îngilîzkî ‘BBC’ xebera xo de ca da zonayişê ravêrdişê sînoran yê tanqanê tirkan. Mûxabîrê BBC Mark Lowen vist vîrî ke nêwazîyeno ke cayê ke DAIŞ ra veng (tol) benê kurdî bi ca bibê. Lowenî aşkere kerd ke derdê esasî yê Enqera sînor de viraştişê heremekê otonom yê kurdan o, yeno gumankerdiş ke no fikir do kurdanê Tirkîye de zî fikrê cîyabîyayişî quwetir bikero.
‘Operasyon kurdan keno hedef’
Rojnameyê ‘New York Times’î zî wendoxanê xo ra ciresna ke mudaxaleyê Cerablûs de emelê Tirkîye kişta sebebanê aysîyayî, hedefkerdişê kurdan o. Rojnameyî hayr ant badê qetlîamê Dîlokî destpakerdişê operasyonî ser û raveyşîyayişê kurdan yê aşmanê peynî vist vîrî. New York Times ke xeber de ca da vînayişanê tayî analîstan da zonayen ke raveyşîyayişê kurdan hetê Cerablûs rîskê bi Tirkîye ameyişê pêver hewadeno’.
Kovarê Alman ‘Der Spîegel’ de zî rûpela xo ya onlîne ra xebera Cerablûs bi sernuşteyê ‘Tanqê tirkan sînorê Sûrîye ravêrna’ da. Xeber de vistîya vîr ke hedefê operasyonî de DAIŞ ra pîya, quwetê kurd zî amey hedefgirewten. Xeber de vajîya ke ‘Operasyon DAIŞî keno hedef, la tenyo o nîyo” û hayr ant serkewtişanê lejkerî yê aşmanê peynî yê QSD û YPG ser. Der Spîegel aşkere kerd ke malê çiçî beno wa bibo Tirkîye wazena sînor de ronayişê heremekê kurd manî bikero.
‘Hedef manîkerdişê korîdorê kurdan’ o’
Rojnameyê Fransî Le Fîgaro zî xebera xo ya ke AFP çime girewt de ca da tehdîdanê dîktatorê tirk Erdoganî ke vatibe operasyon quwetanê kurdan zî hedef gêno. Le Fîgaro vist vîrî ke operasyon raştê zîyaretê Yardimkarê Serokwezîrê Emerîka Joe Biden ame.
Rojnameyê bîn o namedar Le Monde zî ca da qiseyanê sermîyananê tirk yê manîkerdişê ravêrşîyayişê quwetanê kurdan. Le Monde ciresna ke Tirkîye hewl dana ke bi rayverîna YPG de raveyşîyayişê QSD, û sînor de quwetbîyayişê kurdan manî bikero.
Rojnameyê namedar yê Îspanya El Pais zî xebera xo de ca da hedefanê esasî yê operasyonî ser. El Paîs zî vist vîrî ke hedefê operasyonî de DAIŞ esto û va la hedefê tewr gird o bîn zî ‘manîkerdişê korîdorê kurdan’ o.
ANF/NAVENDÊ XEBERAN