Herême de netîceyê operasyonanê leşkerî de şewatî vejîyenî û bi rojan dewam kenî. Bitaybetî Dêrsim, Şirnex û Licê de bi rojan o şewatê daristanan dewam kenî. Babete ser o Ekolojîst û Pawitoxê Heqê Merdiman qisey kerdî û reaksîyon nîşan dayî.Aktîvîstê Ekolojîyî Guner Yanliçî va ‘şewatê daristanan netîceyê polîtîkayê ewleyîye yo’ û wina dewam kerd: “Ma mabênê daristananê rojawan û rojhelatî de cîyayî nêkenî. Wexto ke rojawan de şewat vejîyeno, herkes eşkeno şêro warê şewatî, labelê rojhelat de çîyêko winasî çin o. Îqtîdaro ke tebîet û merdimanê xo reyde pê nêkero, nêşêno serbikewo. Ganî herkes vera heqê cuyayîşî de hesas bibo.”
Seba ma ferq çin o
Aktîvîsta Ekolojîyî Çîlem Aydine zî va ‘herême de welatîyî heme rîskan gênî xo çim û şonî warê şewatî, labelê yenî astengkerdiş’ û wina dewam kerde: “Nasnameyê daristanan çin o. Bi eştişê topan bi hawayo qestî şewat yeno vetiş. No tena şewat nîyo, cezakerdişê herême yo.”Serekê ÎHDyî yê Şûbeya Amedî Racî Bîlîcîyî zî va ‘ma vêrê ra vera Herêma Ewleyî de vejîyenî. Çimkî ê cayan de neheqîyê girdî benî. Heqê weşî, perwerde û gêrayîşî yê şarê herême nê polîtîkayan ra tesîr benî. Sebeb kam beno wa bibo, şewat suc o. Mudaxalekerdişê şewatî karê dewlete yo. Ganî dewlete demêko rewêr mudaxaleyê şewatî bikero.”
DÎHABER/AMED