Dayîke û Merdimê Şeme çalakîya nê hewteyî de keyeyê ke vernîya HDPyî de çalakîye virazenî ser o vindetî. Dayîke û Merdimanê Şeme dîyar kerd ke ê vera dejê keyeyan de rêzdar î û wina va: “Labelê cayo ke reaksîyon yeno nîşandayene şaş o. Herinda ke keyeyî şonî vernîya HDPyî, wa şêrî vernîya AKP û MHPyî de bivinderî. Çimkî ê şer wazenî.”
Dayîke û Merdimê Şeme ke her hewte roja şeme vejîyenî raşteyan û çalakîyan virazenî, no hewte zî xeylê cayan de çalakîyî viraştî. Dayîkî her hewte bi hezaran kesê ke hetê dewlete ra ameyî vînîkerdene ra qala hîkayeya kesêkî kenî û wazenî ke wa dewlete kerdişanê xo yê lêminan de têrî bimano.
No hewte rojeva Dayîke û Merdimanê Şeme de keyeyê ke vernîya Partîya Demokratîke ya Şaran de vindenî estbî. Çalakgêran da zanayene ke muxatabê keyeyan dewlete ya û dîyar kerd ke herinda ke keyeyî vernîya HDPyî de ronîşenî, wa şêrî vernîya AKP û MHPyî de ronîşî, çimkî ê şer wazenî.
Dayîkan ra Nûran Atmacaya ke beşdarê çalakîya Stenbolî bîye, veng daye keyeyê ke vernîya HDPyî de ronîşenî. Atmaca va ‘koyan de ti kes pere nêdano nê domanan’ û wina dewam kerde: “Mi A Haber temaşe kerd û ewja de va ‘ewja de qerargeh awan kerdo’. Nê domanî koyan de otelan de nêmanenî. Nê domanî zulmê dewlete ver şonî koyan. Hende kamera, polîs, cendirme û leşkerî estî. Gelo nê domanî senî şonî koyan? Ê zuran kenî. Herinda ke keyeyî vernîya HDPyî de ronîşenî, wa şêrî vernîya AKP û MHPyî de ronîşî. Eke herinda ke pereyo ke şer rê xerc beno, fabrîkayî bêrî viraştene, o wext domanî nêşonê koyan.”
Şer yeno hesabê tucaranê sîlehan
Atmaca dewamê qiseykerdişê xo de wina va: “Şer yeno hesabê înan. Yeno hesabê tucaranê sîlehan. Çîyo ke beno, ma rê beno. Xora mabênê hesiranê dayîkan de ti ferq çin o. Kura de beno wa bibo, ma nêwazenî ke hesirê domanan war bibo. Ganî AKP û MHP nê proglemî çareser bikero, êdî bes o.”
Muxatabê keyeyan dewlete ya
Birayê Ridvan Karakoço ke 20ê Sibata 1995î de hetê dewlete ra amebî kiştene û dima ra cenazeya ci ameybî dîyayene, Hasan Karakoçî zî va ‘ez dejê ê dayîkan fam kena’ û wina domnaye: “Tewr baş ma fam kenî. Ez wayîrvejîyayîşê înan yê domananê xo teqdîr kena. Labelê cayo ke reaksîyon nîşan danî, şaş o. Berpirsîyarê ci dewlete ya. Dewlete seba ke vernîya şîyayîşê koyan bigîro, probleman çareser bikero. Ma 25 serrî yo ke têkoşîn danî û înan heta nika çekuyêk daxî derheqê ma de nênuşto. Hetta înan hertim vera têkoşînê ma de xo kerr kerdo. Labelê nika ê keyeyan her roje rojeve de tepişenî.”
Ma rê gaz û awa taqyîqine, înan rê werd
Karakoçî qiseykerdişê xo de çalakîyan tevêrna û wina va: “Her roje nê keyeyan kenî manşet. Ma verê dejê ê keyeyan de rêzdar î. Labelê muxatab ewja nîyo. Eke dewlete biwaza eşkena problem çareser bikera. Eke wina bibo, hewce nêkeno ke kes şêro koyan. Ma her hewte çalakîyan virazenî. Serekkomaro ke 2011 de Serekwezîr bi, soz da ma û va ‘ez do problemanê şima çareser bikera’. Dewlete dirî têgêrena. Her hewte bi gaz û awa tazyîqine mudaxaleyê ma kenî û ma tepişeni, labelê ê kesan rê nan yeno berdene. Ez veng dana ê keyeyan ke muxatabê înan HDP nê, dewlete û îdarekarê dewlete yî. Suleyman Soylu, Serekkomar û hetkarê ci yî.”
MA / STENBOL