Hemsereka KCDyî parlamentere Leyla Guvena ke 8ê teşrîna peyêne ra nata yo grevê vêşanîye de ya, herinda ke seba wedarîyayîşê tecrîdî game bêro eştene, aşmêk cezaya dîsîplînî dîyaye aye. Guvene dîyar kerdo ke aye berpirsîyarîya xo bica ana û ganî tavilî tecrîd wedarîyo.
Hemsereka Kongreya Komelê Demokratîke (KCD) û parlamentera HDPyî ya Colemêrgî Leyla Guvena ke seba protestokerdişê tecrîdê serê Rayberê Şarê Kurdî Abdullah Ocalanî 8ê teşrîna peyêne ra nata 15 rojî yo ke grevê vêşanîye de ya. Dimayê çalakîya aye ra hetê Mudurîya Sazîya Înfazê Ceza yê Tîpê E yê Amedî ra tehqîqatê disîplînî amebi destpêkerdene.
Çarçewaya tehqîqatî de pawitişê Guvene girîya. Guvene pawitişê xo de va ‘problemo tewr pîl ê Tirkîya meseleya kurdan a û Ocalano ke wazeno na mesele hal bibo binê şertanê tecrîdî yê giranî de yeno girewtene’ û wina dewam kerdo: “Ez sey parlamenterêk ke hetê şarî ra ameya weçînayene, seba aştîya komelkîye virazîyo û ez mesuldarîya ke şarî dayo mi bica biyarî bawer kena ke ganî tavilî tecrîdê serê birêz Ocalanî bêro wedartene. No grevêko merdimîye û exlaqî yo. Tu zirarê nê grevî îdareyê zîndanî rê yan zî rayapêroyîye rê çin o û sûc nîyo.”
Mudurîya zîndanî zî bi îdîaya ke ‘Do grevê vêşanîye asayîşê sazîye bikero zihîf’ goreyê fiqraya 2. ya bendê (g)yî yê madeyê 40. yê qanûnê bi hûmara 5275î cezaya aşmêk ra heta 3 aşmî cezaya tayê aktîvîteyan ra mehrûmmendişî daye.
Ceza eybêko huqûqî ya
Avûkate Reyhan Yalçindage cezadîyayîşê Guvene ser o qisey kerde û reaksîyon nîşan daye. Yalçindage dîyar kerde ke grevê vêşanîye û vatişê deyîran ser o ceza dîyena hepsîyan û wina va: “Nê cezayî benî sebeb ke keyeyî nêşênbî merdimanê xo reyde pêvînayîşan bikerî. Na cezaye teberê îxlalê heqan a. Çimkî greve vêşanîye bêdîsîplînîye nîya û nêbena sebebê sewbîna çîyan.”
Yalçindage dewamê qiseykerdişê xo de va ‘grevê vêşanîye kesî bi îradeya xo qerar danî û dest pêkenî’ û wina dewam kerde: “Cok ra cezayê dîsîplînî ke yenî dayene, bêhuqûqî yî. No bi hawayo aşkere orte de yo. Madeyo ke sey sebebê ceza ameyo nawitene, merdimi dano fikiryayene. Merdim nêşêno nêyî qebul bikero. Cok ra ma do vera cezaya dîsîplînî de îtîraz bikerî.”
AMED