Vizêr Rojawanê Kurdistanî de weçînayîşê Meclîsê Îdareyê Herême yê Vakurê Sûrîye dest pêkerd. Seba weçînayîşî Herêma Cizîrî de 841, Herêma Firatî de 256, Herêma Efrînî de 206 pêro pîya hezar û 303 sindoqî ronîyayî û 808 hezar 495 weçînitoxî estî.
Ewleyîya weçînayîşî hetê Asayîşê Rojawanî, Hêzê Xopawitişî û Meclîsê Leşkerî yê Suryanî ra ameye girewtiş û her sindoq de 8 kesî wezîfedar î. Babete ser o Endamê Heyetê Caardişî yê Tevgerê Komelê Demokratîke (TEVDEM) Aldar Xelîlî qisey kerd.
Xelîlî va ‘Erdogan xeyalperest o’ û wina dewam kerd: “Erdogan xeyal vîneno. Şarê ma yê Efrînî federasyon ra vano ‘ya’. Şarê ma bi hawayo coş şono sindoqan ser. Cok ra şarê ma do cewab bido Erdoganî. Beno ke hêrişê Efrînî bikerî, labelê nêşênî ewja ra bivejyî. Wa fek dîyayîşê xeyalî ra verabidî.”
‘Sîlehê Amerîka rojeva ma de nîyî’
Xelîlî dewamê qiseykerdişê xo de bale ant îzeheto ke Amerîka kerdbî vatbî ‘dima ra ma do sîlehan tepîya bigîrî’ ser û wina va: “Tena yewe rojeva ma esta, o zî temamkerdişê weçînayîşan o. Rojeva ma de sîlehî çin î. Ma no het de pêvînayîşan zî nêkenî. Sîlehê ke qala înan yena kerdiş, Reqqa û Dêra Zorî de ameyî xebetnayîş.”
MA/AMED