Vera projeyê tûrîzmî rê akerdişê Çimeyanê Mizurî ke hetê dezgehanê dewleta Tirkî ra ame tesdîqkerdene de her ke şono reaksîyonî zêde benî. Serekê Pêroyî yê DADî Mûsa Kûlûyî va ‘bi nê projeyan hêrişê pîrozanê ma kenî’ û wina domna: “Wa bi hawayo lez ewja ra şêrî. Ma projeyanê winasîyan ke zirar danî pîrozanê ma, qebul nêkenî.”
Dewleta Tirkî ke bi serran o Kurdîstan de polîtîkayanê talan, xesp û çinkerdişî domnena, bitaybetî zî herêma Dêrsimî hedef gêna. Dewleta Tirkî bi HES, santral, ocaxê madenan û sewbîna hem tebîetê Dêrsimî talan kena û hem zî bi projeyanê cîya-cîyayan cayanê pîrozan yê Dêrsimî pêşkêşê rantî kena.
Projeyê tûrîzmî rê akerdişê Çimeyanê Mizurî hetê Heyetê Herêma Pawitişê Estenanê Kulturî yê Erzîromî ra ame tesdîqkerdene. Walîyê Dêrsimî Tuncay Sonelî eşkera kerd ke seba nê projeyî pêro pîya 8 mîlyon TL do şêro.
Vera abîyayîşê Çimeyanê Mizûrî yê tûrîzmî de her ke şono reaksîonî zêde benî. Vera nê qerarî de Komeleya Elewîyanê Demokratîkan (DAD) û Komeleya Pîr Sultan Abdalî reaskîyon nîşan dayî. Serekê Pêroyî yê DADî Mûsa Kûlûyî va ‘ma bedilnayîşê cewherê mekananê pîrozan qebul nêkenî’ û wina domna: “Bi nê projeyî hêrişê cayanê pîrozanê ma kenî. Herinda cayê tebîî de ahşab yeno viraştene û no zî zirar dano cewherê ewja.”
Ti kesî melumatêk nêdayo ma
Kûlûyî dewamê qiseykerdişê xo de va ‘wa bi hawayo lez ewja ra şêrî’ û wina dewam kerdo: “Ti cayê dinya de mekanê pîrozî tûrîzmî rê nêabenî. No yeno çinkerdiş û înkarkerdişê aye bawerîye. Ma do destûr nêdî ke zîyar û dîyaranê ma rantî rê bêrî pêşkêşkerdene. Walîyî vato ‘ma goreyê waştişê rêxistinanê sîvîlan no proje amade kerdo’. Labelê heta nika ti kesî no het de melumatêk nêdayo ma. Eke ma biameyêne perskerdene, ma do înan ra bivatêne ke ma çîyêko winasî nêwazenî.”
Ganî herkes vera nê projeyî de bivindero
Serekê Şûbeyê Dêrsimî yê Komeleya Pîr Sultan Abdalî Alî Ekber Kayayî zî wina va: “Ma çarçewaya bawerîya xo de zaf muhîmî danî tîje û tebîetî. Çimeyê Mizurî zî cayanê tewr pîrozan ra yî. Elewîyî nê cayan zîyaret kenî, çeraxan veşnenî û loqmeyê xo vila kenî. Ganî kes dest nêdo nê cayanê pîrozan. Her mudaxaleyo ke vera ewja de yeno kerdene, do vera bawerî û pîrozîyanê ma de bêro kerdene. Cok ra ma qebul nêkenî. Ganî herkes vera nê projeyî de bivindero.”
DÊRSIM / MA