Hemverê hêriş û dişmenîya PDK ya vera Êzidîyanê Şengalî hêrs û nêrazîbîyayîşî her ke şinê hera benê.  Dûştê îtîfaqê PDK-AKP de yew nêrazîbîyayîş zî Kurdanê Kakaî ra amê. Kakaîyan aşkere kerdî ke yê ke hêrîş kerdî nêbeno ke zey pêşmerge bîrê biname kerdiş.  Kakaî yê ke ANF rê qisey kerdî,  vistî vîrî ke lejê Şengalî xîztemê dewleta Tirk keno û zerar dano yewîya neteweyî yê Kurdan.

Welatijan ra Kemal Kerîm Farisî da zonayen ke, lazim o Kurdî hinî vera pê şer nêkerê, hurendîya nayî de yewîya neteweyî xort bikerî. Farisî dîyar kerd ke seba ke Kurdî pêrokîn Kurdistan de serbikewê, yewîya neteweyî şert a û va, “Yê ke vera Kurdan nşer kenê, nêbeno ke ê pêşmerge bê. Ganî pêşmergeyî gerîlayan ra pîya vera dişmenê wertex şer bikerê. No lej xîztemê dişmenî keno. Cok ra ganî lejê Şengal desinde vindero. 

Ma hêrîşan qebûl nêkenê

Pêşmergeyê YNK’yî Ahmet Ebûbekîr’î zî aşkere kerd ke o hêrişanê vera Şengal qebûl nêkeno. Ebûbekîr’î vist vîrî ke ê hetkarê haştîya mîyanî û yewîye. 

Mahîr Cemal’î zî hêrîşan rê nêrazîbîyayîş damûsna û vist vîrî ke no şer xîzmetê dewleta Tirk ya faşîst keno. Cemal’î zî waşt ke Kurdî quwetê xo bikerê yewe û seba azadî têkoşîn bikerê. Selam Kakaî zî vist vîrî ke wexto ke vera Şengalî hêrîşî virazîyay, gerîlayan zî pawitişê înan girewt û dîyar kerd ke zey Kurdek o nayî erjaye vîneno. 

Verê tifinganê xo açarnê dişmenanê xo

Kakaî vist vîrî ke o hêrîşanê vera Şengal zey birakiştişî nêvîneno, zey întixarî vîneno.  Kakayî aşkere kerd ke ê şerê mavêna Kurdan qebûl nêkenê û wina va: “Hinî o wext ravêrya. Ganî problemî bi raya dîyalogî bîrê çareserkerdiş. Rewşa heremî aloz e û no zî fersetekê dano Kurdan. Bi no firsetî ma êşkenê pêrokîn armancê xo yê derheqhe Kurdistanî de bîyarê ca. Ganî pêşmerge û gerîla, û pêrokîn Kurdî verê tifinganê xo açarnê dişmenanê xo. Ganî hedef pawitişê Kurdan bo. Dewleta Tirk par Bakurê Kurdistanî de komkişten kerd. Rewşeke bi na rengî de, nêbeno ke Kurdî vera pê şer bikerê. 

‘Wa êdî mabênê kurdan de şer nêbo’

Şarê Amedî zî hêrişê PDKyî yê vera Şengalî rê nêrazîbîyayîş damûsnay. 

Welatîyan ra Naşîde Buluttekîn Cane hêrişan sey îxanet girewte dest û wina va: “Bitaybetî pêvînayîşê Anqara ra dima hêrişêko winasî bî, no zî nîşanê ma dano ke nê hêrişê biplan î. Wa nê hêrişî bivinderî.” Welatîyan ra Songul Kapanciye va ‘ma ameyîşê Barzanî yê Tirkîya û dima ra hêrişkerdişê ci yê şarê êzidî qebul nêkenî’ û qiseykerdişê xo wina domnaye: “ Herinda ke Barzanî hêrişê Şengalî keno, hema bi hezaran cinîyê êzidî destê DAIŞî de yî, wa şêro înan bixelisno.”

Welatîyan ra Fereç Batuye zî va ‘mabênê PDK û zîhnîyeto ke tebaxa 2014 de hêrişê Şengalî kerd de ti cîyayî çin o’ û wina dewam kerde: “Merdim nêeşkeno vajo no şer, şerê birakiştişî yo. ”

Netîceyê polîtîkayanê şaş o

Îbrahîm Kitayî zî va ‘ma şero ke newe yê birakiştişî nêwazenî’ û wina domna: “Wa kurdan mîyan de yewîye awan biba. Polîtîkayê PDKyî 5 kuruş nêkenî. Nika hewl dano Tirkîya reyde hereket keno, la nêzano ke do ci bixapênî. Heta ke nê polîtîkayî bibî, ê do ma bixapênî. Şaşîyê ke verê cû hetê bawkalanê ma ra ameybî kerdiş, nika hetê Barzanîyî ra yenî kerdiş.”

‘Şerê birayan ra fek verade’

Vasfîye Yîgîte ke vera hêrişan de veng daye Barzanîyî zî wina va: “Ma birayê yewbînan î. Ti şonî Tirkîya reyde pê kenî û hêrişê êzidîyan kenî. Ma nêyî qebul nêkenî. Êdî fek nê şerê birayan ra verade. Ganî nika ra pey kurdî qet nêkewî lejê birayan mîyan û bibî yewe.  


 DAQÛQ / AMED