Qayûmo ke tayînê Şaredarîya Ercîşî bî, qanûnanê hafrîyatî çinî hesibna û destur da şîrketanê taybetan ke hafrîyat û molozan birijnî qeraxê Ercîşî. Hafrîyatê ke ameyî rijnayîş, zirar danî gandaranê awe û tebîetî.Babete ser o Serekê Komeleya Dormeyî ya Wanî Alî Kalçikî qisey kerd û qiseykerdişê xo de bale ant neheqîyan ser.
Kalçikî destpêkê qiseykerdişê xo de wina va: “Qanûnê Hafrîyatan destê şaredarî de yo û bi destûrê şaredarî hafrîyatî ameyî rijnayîş. Na rewşe nîna qebulkerdiş. Herinda ke hafrîyatî bierşawîyayêne cayê newe ra viraştişî, rijnayî qeraxê Ercîşî. Hafrîyatî bi zanayîş erzîyenê qeraxê Ercîşî. Na rewşe sere de zirar dana gandaranê awe. Çîyo ke yeno kerdiş suc o. Qanunê Dormeyî de madeyêk de wina yeno vatiş; Se beno wa bibo, kesê ke zirar bidî dormeyî sucdar î. Şaredarîya Ercişî suc kena û tebîetî qetil kena.”
Helbet do rojêk tîya ra şêrî
Kalçikî dewamê qiseykerdişê xo de va ‘qayûm Mehmet Şîrîn Yaşar vîşêrê reklamê xo, çîyêk nekeno’û qiseykerdişê xo wina qedêna: “Îdarekarî hetêk ra reklamê xo kenî û heto bîn ra zî zirar danî tebîetî. Kesê wezîfedarî suc kenî. Ganî ti rêxistinê sîvîlî verê nê qetlîamî de bêveng nêmanî. Kesê ke wina zirar danî dormeyî, helbet do rojêk tîya ra şêrî. Wa her kes destê xo bido wijdanê xo û bêveng nêmano.”
Xeylê peykeran wedarnay
Heto bîn ra qeyûmo ke tayînî Bazîdê bi zî, peykerê Ehmedê Xanî, Parka Ehmedê Xanî ra wedarna. Qeyûmê Qoser zî 10'ê Hezîran de peykerê Ûgûr Kaymazî wedarna bi.
Qeyûman heta nika peykerê Lamassus yê Şaredarîya Sûka Pîl ê Amedî, peykerê Orhan Dogan ê Cizîrî, peykerê Roboskî yê Şaredarîya Peyasî, Fîgurê Merwanî yê Şaredarîya Yenîşehirî û peykerê Ahmed Arîfî wedarnay.
DÎHABER/WAN