METÎN YOKSU / MA / ÊLIH
Hêrişê ke vera ziwanê Kurdî de benî, dewam kenî. Wedarnîyayîşê tabelayê Kurdî yê Şaredarîya Bidlîsî ra dima nika zî futbolbazê cinîyî seba ke Kurdî qisey kerdî, raştê hêrişî ameyî.
Ame musayene ke futbolbazê cinîyî yê 1955 Batman Beledîyesporî seba ke maçê Kayserî Gençlerbîrlîgî de mîyanê xo de Kurdî qisey kerdî, raştê hêrişî ameyî. Seba ke wextê maçî de futbolbazanê cinîyan mîyanê xo de çekuyanê sey ‘goge bide’, ‘futbolbaze bitepişe’ û ‘bide goge ro’ bikar ardî, çend reyan futbolbaz û hakemi reyde kewtî mîyanê munaqeşeyan û raştê hêrişan ameyî.
Futbolbaze Zehra Acake û Îdarekarê taximî Mustafa Zengînî derheqê çîyê ke qewimîyayî de qisey kerdî. Futbolbaze Zehra Acare va ‘çîyê ke ameyî cuyayene, nînî qebulkerdene’ û wina domnaye: “Maçê verê cu de zî munaqeşeyî vejîyabî û maço peynî de zî dewam kerdî. Ma her hetê cuye de Kurdî qisey kenî. No ziwanê ma yo û ma eşkenî her ca de qisey bikerî. Ma nêyî qebul nêkenî. Ma nê hêrişan qebul nêkenî.”
Ganî ceza bidîyo înan
Îdarekarê taximî Zengînî zî va ‘provokasyonî maço verên ra dest pêkerdî’ û wina dewam kerd: “Mamostayê înan maço verên de herinda ke taktîk nîşanê futbolbazan bido, hertim înan provoke kerdêne. Hêrişê ke vera ziwanê ma de bîyî, nîjadperestîya înan nîşan dana. Heta nika îdarekaranê taximê bînî ra ti kes ozir nêwaşt. Ti kes ma nêgêra. Ma her maç de çîyanê winasîyan reyde têrî manenî. Ma Amedspor ra zanî. Ganî Federasyon vera çîyanê winasîyan de ceza bido.”