Çend rojî verê dewleta tirk hêrişê Şengal û Rojawanê Kurdistanî kerdbî û netîceyê hêrişî de bi desan kesî merdbî. Vera hêrişê dewleta tirkî de her ke şono reaksîyonî hîna zêde benî.
Kurdê ke dewê Heku, Gelto, Baroj û Qiqibtepeyê ke girêdayeyê qezaya Talînî ya Ermenîstanî de cuyenî, bi îzehetêk hêrişê dewleta tirkî şermizar kerdî. Kesê ke beşdarê çalakîye bîyî, fotografanê Rayberê Şarê Kurdî Abdullah Ocalan, beyraqê PKK, KCK û YPGyî hewanayî û bi siloganî ‘Bicuyî Rayber Apo’ qîrayî.
Fek xîyanetî ra vera bide
Îzehet hetê Serekê Kongreya Êzidîyan yê Rûsya û Endamê KNKyî Cemal Şemoyanî ra ame dayîş. Şemoyanî wina va: “Ma sey komelê êzidîyê ke Ermenistan û Rûsya de cuyenî, hêrişê dewleta tirk ya faşîst şermizar kenî. Wa dewleta tirk hişê xo bigîro sereyê xo. No nizdîbîyayîşê dewleta tirk nîno qebulkerdiş. Ganî dewleta tirk fek nê nizdîbîyayîşî ra vera bido. Ma wazenî bibî wayîrê statuyêk. Wa rêxistinê ke hemkarîya hêrişkaran kenî zî fek xîyanetî ra vera bidî.” Îzehet ra dima dewij û muxtarê dewan qisey kerdî û hêriş lanet kerdî. Îzehet bi sloganê ‘Bicuyî xoverdayîşê Şengalî’ û ‘Bicuyî xoverdayîşê Rojawanî’ qedîya.
ANF/ERÎVAN