Serekê Pêroyîn ya Federasyona Elewî Bektaşî (ABF) Bakî Duzgun û Serekê Pêroyîn ya Komeleyêy Kulturê Elewîyan (AKD) Dogan Demîr wexto ke Stenbolî ra semeda kombîyayîşê aştî şînê Enqere, rayîr de raştê hêrişê bi çek amey. Qirkerdişê Pirsûsî ra dima medyaya AKPî Bakî Duzgun seyî hedef nîşan da û dima zî hêrişek bi no awayî virazya. Hêrişî ra çend rojî ver Şaredarê Şaristano Gird ya Enqereyî Melîh Gokçek nuçeyêy ke Bakî Duzgun hedef gêno Medyaya komelî rê serwîs kerd û gef werdîy. Dogan û Demîr nêy hêrişan sero qalî kerdîy.
Hêriş plankerde yo
Demîr dîyar kerd ke înan Stenbolî ra ameynê Enqere û wexto ke 70-80 kîlometre nêzdî şaristanî bî raştê hêrişê bi çek amey û wina vat: “Hêrişek bi qontrol bî. Semeda ke ma seracêr şînê waştênê ke seyî qeza nîşan bidî û hedîse dîyar o ke plankerde yo. Wexto ke erebe bi lez seracêr şînê, ger ke yew fîşek zî tekela erebeyî bigunaynê do erebe teqla bifînaynê û seyî ke qeza bîyo biameynê nîşandayîş. Aye wext do herkesî zî wina fam bikerdênê.”
Ma raştê gefan yenîy
Demîr dergeyîya qalîkerdişê xo de ciresna ke no demo ke derge yo ke gefan wenîy û him ser medyaya komelî û him zî bi rayîrê telefonan gefêy hemverê înan vêşî bî û wina domna: “Ma înan rayîrberan ra vanîy û vanîy wa tedbîran bigîrî. Tena ma ney, no babetî de asayîşê canê şarê ma zî çin o. Hêrişê cemxaneyê ma kenî. 3 roj verê hêrişê Serekê şaxa ma kerdîy. Vizêr hemverê ma û siba do hemverê kamî hêriş bikerî dîyar nîyo.
Wazenîy bitersnîy
Duzgun vat: “Goreyê min na hêriş semeda ke çimê ma bitersnî ame kerdiş. Semeda qeza bidîy kerdiş, viraştî. Ger ke biwaştênê ma bikişî do asanêr şînaynê bidaynê ma ro. Ma baş zanîy ke êy ke aştî nêwazenîy kam î. Êy hêzêy ke DAIŞî reyde tifaq virazenîy î. Nêy 20 rojêy peynî de ma rojnameyan de hedef yenî nîşandayîş.”
Tewr peynî Duzgun ard ziwan ke Şaredarê Engqereyî Melîh Gokçekî rojnameya Akîtî de înan hedef nîşan dayo û wina domna: “Hêzêy ke wazenîy elewîyan bitersnî û hedef nîşan bidî hêrişê ma kenî. Bi serreyan o ke hêriş û qirkerdişan kenîy la elewî aştî de bi israr î.”
Ma Vengê Çekî Seh Kerd
Serekê Pêroyîn ya ABFî Bakî Duzgun zî ard ziwan ke înan bi erebe seracêr şîynê û nêzdîyê raşteyê radarî de ma tayna hêdî bîy. Aye wext ma vengê çekî seh kerd û wina vat: “Ma ser şerîta emnîyetî de yew erebe bi vindete dî û ma a erebe ra bi gumanî. Ma cayê hêrişî ra 25 km dima vindertîy û ma waştîy ke xo biresnî polîsan, la polîsî yew seet û nêm ra pêy agêray ma.”