Rojhelato Mîyanên de polîtîka, zê rewşa Tirkîyaya ewroyine, bi ferasetê biratîya vergan yena kerdiş. Seba ke heme hesabî, bi goreyê menfîetan ê, soz, bext, exlaq û wijdan çîn yê. Kam çi wext dost û çi wext neyar o, kifş nîyo. Kam do çi wext kamî biroşo, nîno zanayîş. Zê Tirkîya, kesêy ke vizêrî bira û ortaxî bîy, ewro neyar, êy ke vizêrî hakimî bî ewro mehkûm û yê ke ewro mehkûmê bî îxtîmalêko pîl do mêşt de, bibê hakim. Hêzê emperyal û dîzaynkerî, bi goreyê menfîet û rihet-gêrayîşê sermayeya globale, hêzê îqtîdarî yê herme yanê wekîlî, bi waşteka pawitişê statukoya xo ya estî ye û wekîlê wekîlan zî bi ferasetê vergê haran seba bidestvistişê berateyêke, hereket kenê. Destpêka şerê Sûrîye ra na heta, ke merdim biawno tifaqan ra, na rewşe zaf zelal eysena. Tifaqêy ke serre de bibî, nika çîn yê. Dostîy bîyê neyarî, neyarî bîyê dostîy. Tay esîlan wekîlî, tay wekîlan zî wekîlê wekîlan rotê.Na alozîye de rewşa tewir balkêşe, ya Dewleta Tirk û AKP-Erdoganî ya. Di serre de, Erdogan wekaletê kooalîsyonê mîyan-netewî ser o, bi wezîfeya awankerdişê xetêka sûnî ya verva kemberê şîîyan, ame wezîfedarkerdiş.
Erdoganî vernî de birayê xo Esad rot
Seba nayê gere di serre de birayê Erdoganî, Beşar Esad biyamebê vistiş. Erdoganî vernî birayê xo Esad rot. Dime ra zî bi neyartîya xo ya verva kurdan û di şexsê xo de newe ra awanker- dişê rihê Împaratorîya Osmanî, bi çimsûrîyêka bêsaloxe kewt mîyanê têgeyrayîşan.Erdogan wina çimsûr bi ke perrêke de vengdayê şarê Sûrîye dewetê Tirkîya kerdê û perro bîn de zî verva Esadî komê çeteyan perwerde kerdê. Hêzê esîlan nîyetê Erdoganî fam kerdbî. Koalîsyon verva DAIŞî virazîyabî. Erdoganî wayîrtîya DAIŞî kerdê. Gere zincîya ey bîyamebê fereknayîş. Bi çûçû-kerdişê tayine, teyareyê Rûsya hetê Tirkîya ra ame vistiş.
Bi naye xeyalê Erdoganî yê Sûrîya kewtî awe. Erdogan cikewtiş haca, êdî nêşika zincîya xo radergê Sûrîye bikero. Esîlan, Erdogan rotbî. Tirkîya bi çimsûrîya Erdoganî bibî neyarê Pûtînî. Hetê polîsêkê tirkî ra kişyayîşê konsolosê Anqara yê Rûsya, Erdogan dora dîyine, vist verara Pûtînî. Erdogan hetê Pûtînî ra ame mecbûrkerdiş ke Heleb de çeteyanê/ortaxanê xo biroşo. Endamê NATO yê şeştî serran Tirkîya, hemver Emerîka bibî ortaxê Rûsya û Îranî.Ortaxê verînî yê Erdoganî, Erebistano Siûdî û Katar ke seba şikitişê tesîrê Îranî ya Îraq û Sûrîya ser o, pîya çetey fînanse kerdê, amey vîrî ra kerdiş. Erdoganî Katar û Siûdî rotî. Do roca înan a hesabpersayîşî zî bêro. No hesab hetê aborî ra yeno perskerdiş. Aborîya Tirkîya dolar û tûrîstanê Siûdî sero geyrayê. Rewşa dolarî ya ewroyine gere qasêke bi naya girêdaye zî bêro wendiş. Nika hefsarê AKP-Erdoganî destê Pûtînî de yo. Kamco heta kaş bikero, mecbûro şêro. Xora çîyê ke waştê bi Erdoganî bido kerdiş zî day kerdiş. Kişta bîne de meselaya weçînayişî ya Emerîka qedîya û Trûmpî dest bi kar kerd û do reyna daxilê Sûrîya bibo. Na dore do Pûtîn bi hêrsê teyare, pîlotî û konsolosî, Tirkîya biroşo. Yo ke bigero, do est bo gelo. Texmîn nêkena la tersê min, do reyna ma kurdan rê bimano.Yanê meselaya marê fekê jûjeyî, reyna qedera Erdogan-AKP û Tirkîya ya.