Têkilîyanê mîyannetewîyan de hesabî, menfîetanê netewîyan ser o yenê rayirberdiş. Menfîetê netewî, heme erjan ser ra yê. Gama ke mijare menfîetê dewletan bê, tu qîmetêkê erjanê exlaqî û merdimayî derbas nêbeno. Na pergale zî hetê sermîyanê gerdûnî ra yena dîzaynkerdene. Her çende şîyarê nêy têkilîyan “wa her didi perrîy zî qezenc bikerê” bo zî, zafêrî hêzê hegemonîkî naye ra biqezenc vecîyenê.
Pergale çendêke bêexlaqe bo zî, bi goreyê xo wayir tay qeyde û raybazana zî. Nê qeydeyî zî reyna seba ewleyî û rehet hereketkerdişê sermîyanê gerdûnî ameyê ronayîş. Heta ke naye rê rîayet bibo, heme qilêrinî û bêexlaqîyanê dewletan rê, çimî yenê girotiş.
Tirkîya badê Şerê Cîhanî yê 2.pergala NATO de ca girewte. Di mîyanê na pergale de verva Bloka Varşova, cendirmetîye kerde. Bi paştîdayîşê na pergale, di mîyanê xo de verva şar û bawerîyê cîyayan heme hovîtî, bêexlaqî û wehşetî pêk ardîy. Bi ferasetê “ma her didi zî qezenç bikerê” heme qetlîam û hovîtîyanê dewleta Tirke rê, çim û goşî ameyî padayîş.
Heman pergale, dîzaynê seserre yê neweyî de rolê verkêşîya Rochelatê Mîyanênî zî da Tirkîya. Xora Erdogan bi destûr û erêkerdişê na pergale bi îqtîdar. Di derûnîya îqtîdaranê Rochelatî de qalikê xo ra vecîyayîş, ferasetêko îrsî yo. Erdogan zî zê îqtîdaranê Rochelatê Mîyanênî ame astêka winayîne ke êdî zirar danê pergala sermîyanê gerdûnî.
Têkilî û bazarê Zerrabî û hikumatê Erdoganî, hetê Emerîka ra destpêke ra ameyê zanayîş. Wexto ke Erdogan û Zerrabî no tîcaret kerdê zî Erdogan qada mîyannetewî de zê serokwezîrê tewr bi qedirî, ameyê verwazîkerdene. Na kirêdîya mîyannetewîye, Erdogan fehş kerd. Erdogan qalikê xo ra vecîya. Erdoganî vat, dinya nawa ke ez tede ya. Vernîya Erdoganî de zê kelemêke tenê kurdî est bîy.
Seba ke nê kelemîy zî orte ra wedaro, verva şarê kurdî lejo ke “şerê estbîyîş û çînêbîyîşî” bi name kerdbî, da destpêkerdiş. Çîyê ke Erdoganî di bajaranê Kurdistanî de bi kar ardîy, kerdenanê Sedam û Esedî kemîyêr nêbî û verê çimanê heme dinya de ameyî kerdene. Heke Erdogan di ney şerî de bi ser bikewtêne, têkilîyê qilêrinî êy Erdogan û Zerrabî, bi tu awayî nîyameyêne rojdeme. Seba pergala gerdûnî Erdogan kesêko tewir kêrameye bi. Bêke rayapêroyî ya Tirkîya verê çiman de bigerê, heme kar û barê xo bi Erdoganî dayê kerdene.
Bi ney hêrs û kîna verva şarê Kurdî, Erdoganî heme raybazê pergala gerdûnî binling kerdîy. Perrêke de têkşîyişê verva Têgêrayîşê Azadîye yê Şarê Kurdî, perro bîn de zî bi heme malbate û dormeyê xo heta qirike kewtişê mîyanê pîsîtîyan, peynîya Erdoganî arde. Bêke şaşîyîyanê xo ra ageyro bi kîna verva şarê Kurdî, qaşo waşt nakokîyanê mîyannetewîyan ra îstîfade bikero û îqtîdarê xo bidomno.
Bi naye zî, na dore kewt verarê Rûsya. Rûsya zî bi goreyê menfîetanê xo Erdogan bi kar arde. Bi rayira Erdoganî, meşûrîyetê Esedî ame erkêrdene û Esed Sûrîya de bi ser kewt. Erdogan, nika zê geyrendoyo ke “Îsayî ra bi û Mihemmed zî nêqefelna” di orte de mendo. Seba Erdoganî wext wextê hesabdayîşî yo.
Ney hesabî, bi Zerrabî dest pêkerd. Do heta kam cayî şêro kifş nîyo la na kifşa ke nameyê Erdoganî hetê hêzê gerdûnîyan ra ameyo xêzkerdiş. Hema hesabê Rûsya zî est ê. Rûsya zî do rocêke defterê hesaban abikero.
Destpêk ra heta ewro bi sernêkewtişê polîtîkayanê Erdoganî de hêza serekeye, Hereketê Azadîye yê Şarê Kurdî yo. No tesbît û cerabnayîşo tarîxî, dorêka bîne ame teqezkerdiş. Îqtîdaro ke bi çinêkerdişê Hereketê Azadîye bikewo rayîr, bixo çinê beno.
Serra 40. ya PKKyî firaze bo.