Badê ke bajarê Wanî de Santralê Hîdroelektrîkî (HES) yê Ayrancilarî kewt faalîyet, herikîyayîşê awa Muradîye de bedilnayîşî virazîyayî. Santral awa Muradîye de bî sebebê kêmîbîyayîşê awe. Her çiqas ke viraştişê santralî ser ro 3 serrî biviyarî zî kiştê newala Bendîmahî de ziwayî virazîyayî. Na rewşe ra tewr zêde maseyê Încî Kefalîyê ke aşma nîsane û temuze de seba bicakerdişê hakanê xo awe ra vejîyenê tesîr benê. Babete ser o Serekê Komeleya Dormeyî ya Wanî Alî Kalçikî qisey kerd.
HESî yeno mehneya qirkerdişê cu û gandaran
Kalçikî qiseykerdişê xo de bale ant HESan ser û wina va: “Viraştişê HESan yeno mehneya qirkerdişê cu û gandaran. Awe de tewir bi tewir gandarî estî. Herême de mergê komî yê maseyan virazîyayî. Tena maseyê Încî Kefalî awa solin de cuyenî û newala Bendîmahî de hakanê xo ronenî. La aye zî kêmîbîyayîşê awe ver çinêbîyayîş ver de yî û nêeşkenî ke hakanê xo bironî. Maseyê ke yenê tîya mirenî.”Kalçikî dewamê qiseykerdişê xo de va ‘kêmîbîyayîşê awe ver dewijî nêeşkenî ke hêgayanê xo awe bidî’ û wina qedêna: “Dewijî kêmîyê awe ver nêşênî awe bidî. Xeylê kesî mexdur benî. Heme gandaran rê nexeqî yeno kerdiş. Ganî îdarekarî fek şaşîye ra verabidî.”
DÎHABER/WAN