Rejîma Sûrîye 16ê Tebax de destpa êrişê Asayîşê Hesekê kerd. Netîceyê nê êrişan de 2 azayê Asayişî weşîya xo kerd vinî. Dûştê nê êrişan quwetanê asayişî û YPG cewabekê wişk da rejîmî. Heta nika pirodayişan de xêlê lejkerê rejîmî û çeteyî kişîyay. Rejîma ke derbeyê girdî werdî roja verî bi teyareyanê lejî û topan Hesekê bombevornayen kerd. Netîceyê bombevornayenî de 4 domanan ra pîya 7 sivîlan weşîya xo kerd vinî, xêlê ci zî bî dirbetin. 16ê Tebax ra na het 2ê ci azayê Asayişî, 8 sivîlî pêro pîya 10 kesan weşîya xo kerd vinî. Teyareyanê rejîmî vizêr seat 14.35î de reyna taxa Neşwa Şerqiya bi teyareyanê lej bombevaran kerd.
Konseyê pawiten aya kerd
Heto bîn ra Serokê Konseyê Pawiten yê Îdareya Xoser ya Demokratîk yê Rojawa Rêzan Gulo rejîma Baasî aya kerd û da zonayen ke eke vera Hesekê êrişî dewam bikerê cewabê înan do wişk bo. Gulo vist vîrî ke êrişê rejîmî badê xelesnayişê Minbicî destpa kerdê û va, meqsedê nê êrişan manîkerdişê Sîstemê Federala Demokratîk yê Bakûrê Sûrîye yo. Gulo aşkere kerd ke nê êrişî netîceyê îtifaqê Tirkîye û Îran de benê û da zonayen ke iyê dê Hesekê azad bikerê.
Hemserokîna Meclîsa Ronayen ê Sîstema Federalîya Demokratîk a Rojawa-Bakurê Sûriye zî êrişanê rejîma BAAS yê vera Hesekê rê nêrazîbîyen damûsna. Meclîsî êrişanê dûştê Hesekê û yê çeteyan dûştê Şêxmeqsûd zey netîceyê kordîneyekê mavêna rejîm û dewleta tirkî hesibna. Meclîsî rejîm aya kerd û waşt ke desinde êrişanê xo inderno.
ANF/HESEKÊ