Barajê Ilisûyî yo ke hetê dewleta Tirkî ra yeno viraştene ver Heskîfo ke tarîxê ci 12 hezar serrî yo binê awe de maneno. Rixmê razînêbîyayîşê xeylî dormeyanê dinya zî talanê tebîet û tarîxî dewam keno û tay mendo ke Heskîfo tarîxî bi temamî binê awe de bimano.
Çapemenîya Norveç û Danîmarka demê çinkerdişê Heskîfî bi manşetanê ‘Têkoşîno bizor’ û ‘Tirkîya bajarê Kurdan ê kanî binê awe de verdana‘ kiriştê rojeva xo. Makaleyan de qala muhîmîya tarîxî û kulturkî ya Heskîfî ameyo kerdene û bale ameye antene tarîxê Heskîfî ser û ameyo vatene ke bi nê projeyî mîrasê dinya yo kulturkî yeno çinkerdene.
Reyna çapemenîya Norveçî de ameyo vîrardene ke rixmê heme reaksîyon û çalakîyanê Heskîfî û Newala Dîcle bi Barajê Ilisûyî yeno waştene ke binê awe de bêrê verdayene û tehlukeyê raşîyayîşî dewam keno. Medyaya Danîmarke de ameyo dîyarkerdene ke Tirkîya hetêk ra tarîxê Kurdan çin kena û awa ke şina Îraq kêmî kena, hetê bînî ra çarçeweya projeyî de 190 dewê ke kişta Dîcle de yê seba ke binê awe de yenê mendenê şarê herême mecbur maneno ke koç bikero.
ANF / BRUKSEL