FERHAT FERAŞÎN / ANHA/DÊRA ZOR
17ê teşrîna peyêne de çeteyanê DAIŞî seba ke cayê petrolî yê Tenekî bigîrî, hêrişê şerwananê HSDyî kerdî. Labelê şerwanan heta guleyanê xo yê peyênan xover dayî û netîceyê pêrodayîşêko şiddetinî de cayê petrolî pawitî.
Şerwanan qisey kerdî û derheqê pêrodayîşî de melumatî dayî. Şerwanan ra Elîşêr Şedadêyî va ‘wexto ke hêriş virazîya, ma cewab da çeteyan’ û wina dewam kerd: “Nizdîyê 1 saet û nîme şer dewam kerd. Hêrişêko giran bî û çeteyî zaf bî. Ma heta cephaneyê xo yo peyên şer kerd. Dima ra ma bi tanqê xo da panzerî ro û panzer hedef girewt û îmha bî. Embaz Şehîd Rêzanî qîra û va ‘nameyê nê xoverdayîşî heta guleyo peyên xoverdayîş o’. No seba ma mesajê xoverdayîşî bî.”
Şahîn Dêriko ke ê vîstan cuya zî qisey kerd û wina va: “Herçiqas ke destê ma de cephane nêmend, reyna zî ma bi ruhêko fedaî xover da. Dima ra cephane ma resa û ma derbeyê girdî dayî çeteyan ro. Çeteyan pey xo de 7 cenazeyî verdayî û remayî. Netîceyê pêrodayîşî de 2 wesayîtî, 1 panzer û 2 wesayîtê ke sîlehê doçka ser de estbî, ameyî îmhakerdiş.”
Wexto ke roportaj qedîya, şerwanan ra Elîşêrî agêra û bi vengêko berz, va ‘Siwar ameyî peya şîyî’.