Badê îlankerdişê rewşa OHALî zîndanê Tirkîya de hêriş û zextî zêde bîyî. Zîndanê Cinîyan yê Tîpa Tyî yê Tarsusî aşmêk ver abî. Cinîyê ke sewqê nê zîndanî bîyî, abîyayîşê zîndanî ra nata her roje raştê îşkence, hêriş û tehdîtê tecawizî yenî. Cinîyê hepsî yê ke Zîndanê Cinîyan yê Sîncan û Zîndanê Cinîyan yê Tîpa Cyî yê Tarsusî ra sewqê Zîndanê Tîpa Tyî bîyî hetê leşker û gardîyanan ra yenê kutiş, erd ra yenê kirantiş û tehdîdê tecawizkerdişî reyde rî bi rî manenê.
Mesûlê merdişê 11 kesan o
Ame zanayîş ke Mudirê Zîndanê Tarsusî Mahmut Çaçanî serra 1996î de wexto ke Zîndanê Amedî de 11 hepsîyê sîyasî merdî û 24 hepsîyê sîyasî zî birîndar bîbî o Mudirê 1. yê Zîndanê Amedî yê Tîpa Eyî bî. Babete ser o Hetkara Serekê Pêroyî ya Komeleya Heqê Merdiman (ÎHD) Necla Şengule qisey kerde.
Zîndanê Tirkîya de mantixê osmanîyan esto
Şengule qiseykerdişê xo de wina va: “Zîndanê Tirkîya de mantixê osmanîyan esto. Îlankerdişê rewşa OHALî ra dima Qerarnameyê Hukmê Qanûnî (KHK) ameyî vetiş û xeylê îxlalê heqan bi KHKyan bîyî fermî. Her çiqas ke OHAL bibo zî zîndanan de îxlalê heqan teberê Peymana Heqê Merdiman ya Ewropa û Qanûnan (AÎHS) de yî. Îdarekarê komeleya ma şîyî zîndanê Tarsusî û raporêk amade kerdî. Ma bi îzehetêk netîceyê raporî aşkera kerd û ma erşawit xeylê ca û partîyê sîyasîyan.“
Şengule vist vîrî ke iyê dê taqîpkarê doze be û wina va: “Heto bîn ra zî ma derheqê wezîfeder û gardîyanan de doze akerd. Dewlete heta nika ti cewab nêdaya ma. Ma do şopdarê zîndanê Tarsusî bibî û kesê berpirsîyar do hesab bidî.”
ŞÛJIN/ANQARA