Namzedê Serekkomarîye yê HDPyî Selahattîn Demîrtaşo ke Zîndanê Edîrne de tewqîfkerde yo, kampanyaya xo ya weçînayîşê 24ê Hezîrane zî zîndan ra bi rayîrê keye û avûkatan domneno. Herçiqas ke îmkanê ci sînordar bibî, labelê reyna zî Demîrtaş hewl dano perspektîfê xo yê weçînayîşî biresno rayapêroyî. Na çarçewa de cewab dano îdîayanê namzedanê bînan.
Çend rojî verê Serekkomar Erdoganî mîtîngêkê xo de vatbi ‘ganî şert û şurtê namzedîya Serekkomarîye bibî û na şaşîye bêro raştkerdiş’. Erdoganî bi no hawa bale antbi tewqîfbîyayeyîya Demîrtaşî ser.
Demîrtaşî zî bi rayîrê avûkatanê xo, ser hesabê Twîtterî ra cewab da Erdoganî. Demîrtaşî mesajê xo de wina vato: “Biewne ez na rey beşdarê to bena Erdogan. Mesela, seba namzedîya serekkomarîye, ganî dîplomaya to bibîyêne. Labelê heta ewro ti kesî dîplomaya to nêdîyo. Seba namzedîye krîterê mi temam î, labelê yê to şikin î.”
Erdoganî talîmat da medyaya hetgire
Heto bîn ra Erdoganî televîzyonêko hetgir de îtîraf kerd ke o talîmat dayo Heyetê Weçînayîşî yê Berzî (YSK) ke derheqê antişê propoganda yê Demîrtaşî de wa goreyê vatişê ey hereket bikerî. Erdoganî televîzyon de wina vato: “YSK reyde pêvînayîş bikerê, wa şêrî zîndan de qiseykerdişê Demîrtaşî biancî, xora antiş ganî nîyo. Cok ra eşkenî goreyê xo biweşênî.’ Erodganî bi no hawa bale anto sansurî ser.
MERKEZÊ XEBERAN