Tepiştişî ra dima bi hezaran kesî şaredarîye ver de kom bîyî û her çiqas ke polîsî hêrişê înan kerd zî, şar fek îradeya xo ra nêverda.
Vizêr zî vernîya şaredarîye de îzehetê çapemenîye ame viraştiş. Bi hezaran Amedijî beşdarê îzehetî bîyî. Hemserekê Pêroyî yê DBPyî Kamuran Yuksek, Hemserekê Pêroyî yê HDPyî Selahattîn Demîrtaş û Hemverfekê HDKyî Ertugrul Kurkçu zî îzehet de amade bî.
Hemserekê Pêroyî yê HDPyî Selahattîn Demîrtaşî îzehetî de qisey kerd.
Ma dê keye bi keye nê zilmî bidî eşnawitiş
Ez seba sereyî ra heta nika wayîrvejîyayîşê şima, şima rê spas kena û qiseykerdişê xo wina domna: “Roja sifteyînî ra heta nika ti bajarê Kurdistanî de înternet çin o û dest ronîyayo televîzyonanê muxalîfan ser. Xebatkarê çapemenîye ancenî la merkezê înan tersê Qesre ra çîyê ke qewimîyenî do nêweşênî. Ma dê çîyo ke qewimîyenî, sey çîyê hêsan qebûl nêkerî. Azadîya ti kesî ya ke edalet ver de sûc bikero, çin a. Ganî mehkemekerdişêko adil bibo ke ma bi rehetî mehkemebîyîşî qebûl bikerî. Orte de mehkeme çin a. Komîsyonê huqûqî yê AKPyî qey mi mehkeme kena. Gelo ma mecbûr î ke îfade bidî nê dozgeran? Ma duştê dozgerê ke bi talîmatê Qesre hereket kenî yî.”
Ti kes nêeşkeno şaredarîyanê ma sûcdar bikero
Demîrtaşî dewamê qiseykerdişê xo de va eke hemserekê şaredarîyanê ma sûcêk kerdo, ewil ma ceza danî înan û wina dewam kerd: “Hemserekê şaredarîyanê ma bi taybetî zî Kişanake û Anliyî heme îmkananê xo seba aştîye seferber kerdî. Ti kes nêeşkeno şaredarîyanê ma sûcdar bikero. Eke şima kesê ke destege danî terorî gêrenî, o wext Stenbol û Enqere ra biewnênê. Seba piştîdayîşê terorî Gokçek û Topbaşî ra biewnênê. Yê ke nîmeyê Enqere dayo cematê Gulenî, înan ra biewnênê. Çend rojî yo ke tîya ra nêvejîyayî. Nêşkenî îspat bikerî ke tîya ra yew quruşê pereyî vejîyayo. Nêyî heme zûrî yî. Çimkî çîyêko winasî çin o.”
Demîrtaşî peynîya qiseykerdişê xo de va: “heta nika ma her tim weçînayîşê verwext dîye, la nika ra pey weçînayîşo verwext çin o. Heta tepîya girewtişê şaredarîyan xoverdayîş esto.”
DÎHA / AMED