Rayberê Şarê Kurdî Abdullah Ocalanî ser o tecrîdo girankerde dewam keno. Operesayonê qirkerdişê sîyasî ke 9ê Teşrîna verêne de vera rojnamegeran û endamanê HDP, DBP, KCD, TJA û DÎKî de ameyî viraştene, ê ke ameyî tepiştene pêroyinî ra derheqê tecrîdî de persî ameyî persayene.
Parlamentera HDPyî ya Amedî Salîha Aydenîze polîtîkaya tecrîdî û hêrişkerdişê şarî ya dewleta tirkî ser o qisey kerd. Aydenîze va ‘embazê ma ke girewtî tepişti înan ra tecrîd persayî’ û wina dewam kerde: “No zî ramojneno ke ê wazenê ke faşîzm û dîktatorîya xo mende bikerî. Coka şîddet, zext û zilmê xo zêdnenî. Ê zî hol zanê ke felsefeya Birêz Ocalanî ke Rojhelato Mîyanên de vila bîyo, omidê şaranî yê dinya ya. Eke bi ey dîyayîş virazîyo na raştî hêna vejîyena orte. No semed ra bi persanê tecrîdî wazenê ke zextan bikerî û şarî bitersnî. Ê zî zanê ke tecrîdo ke Birêz Ocalanî ser o yeno domnayene, yeno manaya tecrîdkerdişê pêroyê Rojhelatê Mîyanênî û xorîkerdişê şerî.”
Aydenîze dîyar kerde ke heta Ocalanî ser o tecrîd bêro domnayene, atmosferê Rojhelatê Mîyanênî nêbedilîyeno û hol nêbeno û wina domnaye: “Dîktatorîye bi dewamkerdişê tecrîdî wazena ke payra bimano. Cok ra nêwazanê tecrîd bibo rojeve û vera ci de çalakîyî bêrî viraştene. Dewlete goreyê xo qeraranê sîyasîyan gêna û seba bicaardişê nînan ganî lingê komelkî û sîyasî bêrî şikitene. Nê lingî zî partîyê sîyasî, dezgehê sivîlî, cinî û gencê ma yê. Operasyonê qirkerdişê sîyasî no semed ra benî.”
AMED