Amed, Wan, Riha, Colemêrg û Edene de xeylê kesî seba ke tecrîd şermizar bikerî û destek bidî çalakîya Leyla Guvene, kewtî grevê vêşanîye. Çalakîkeran da zanayene ke waştişê Leyla Guvene, waştişê înan o û va ‘heta wedarîyayîşê tecrîdî ma do çalakîyanê xo bidomnî’.

Rayberê Şarê Kurdî Abdullah Ocalan nizdîyê 3 serrî yo ke ti xebere tira nîna girewtene. Muracatê ke seba pêvînayîşî yenî kerdene, bi mehneyanê cîya-cîyayan yenî redkerdene û Ocalanî ser o îzolasyonêko xurt yeno domnayene.

Vera tecrîd û îzolasyonî de sere de Ewropa û xeylê cayanê bînan de kurdî û dostê kurdan payan ser o yî û çalakîyanê tewir bi tewiran, tecrîdî şermizar kenî û azadîya Ocalanî wazenî. Nê çalakîyan ra yewe zî çalakîya grevê vêşanîye yê Hemsereka Kongreya Komelê Demokratîke Leyla Guvene ya.

Seke yeno zanayene Leyla Guvene 8ê teşrîna peyêne de dest bi grevê vêşanîye kerdbî û çalakîya Guvene roja 12. de dewam kena. Her roje destekê ke dîyenî Guvene zêde benî. HDPyî seba ke destek bido çalakîya Guvene û tecrîd şermizar bikero, 17ê teşrîna peyêne de seba 2 rojan çalakîyê grevê vêşanîye da destpêkerdene.

Bajaranê Amed, Riha, Wan, Colemêrg û Edene de grevî destpêkerdî û sere de parlamenter û sîyasetmedarî, temsîlkarê dezgehan û xeylê kesî beşdarê çalakîyan bîyî. 2 rojan mîyan de xeylê kesî ameyî zîyaretê çalakîkeran û destek dayî înan.

Ganî tecrîd wedarîyo

Amed de 16 kesê ke mîyanê înan de parlamenterê HDPyî Salîha Aydenîze û Dersim Dage zî estî, kewtî grev. Çalakîkeran cilê ke ser o ‘Leyla Guvene heqdar a, ganî tecrîd wedarîyo’ nuştêne, xoradayî. Çalakîkerê ke kewtî grevê vêşanîye, dîyar kerdî ke Rayberê Şarê Kurdî Abdullah Ocalan hêvîya Rojhelatê Mîyanênî yo û Ocalanî ser o tecrîdêko girankerde esto. Çalakîkeran da zanayene ke ancax têkoşînêko gird eşkeno nê tecrîdê giranî wedarno.   

Ma do tecrîd rê bibî cewab

Bajarê Riha de zî parlamenterî Ayşe Surucu û Semra Guzele û îdarekarê partîyî zî tede xeylê kesî seba destekdayîşê Guvene kewtî grevê vêşanîye. Parlamentera HDPyî ya Amedî Semra Guzele vera tecrîdî de reaksîyon nîşan daye û qala têkoşîno ke bêro dayene kerde. Guzele qiseykerdişê xo de va ‘Ganî ma Leyla Guvene rê bibî cewab û peynîya tecrîdî bîyarî’.

‘Çi ma dest ra bêro, ma do bikerî’

Bajarê Wanî de parlamenterî Muazzez Orhane, Murat Sarisaç û temsîlkarê dezgehan zî tede 20 kesan seba ke tecrîd şermizar bikerî û destek bidî Guvene kewtî grevê vêşanîye kerdî. Bajarê Colemêrgî de zî parlamenterî Nuran Îmîre û Saît Dede û xeylê kesê bînî kewtî grevê vêşanîye. Çalakîkeran dîyar kerd ke seba wedarnayîşê tecrîdî çi destê înan ra bêro, ê do bikerî.

Bajarê Edene de parlamenterê HDPyî Remzîye Tosune, Tulay Hatîmogullari û Kemal Pekoz û xeylê sîyasetmedar û xebatkarî kewtî grevê vêşanîye. Çalakîkeran vera tecrîdî de reaksîyon nîşan da û dîyar kerdî ke çalakîya Leyla Guvene çalakîyêka heqdare ya û waştişê aye waştişê înan o zî. Çalakîkeran waşt ke wa tecrîd demêko raver bêro wedarnayene.

 

MERKEZÊ XEBERAN