Seba wedarnayîşê tecrîdê serê Rayberê Şarê Kurdî Abdullah Ocalanî, grevê vêşanîye û rojeyê mergî dewam kenî. Vera tecrîdî de sere de bajaranê Ewropa û Dêrsim de zî çalakîyê şermizarkerdişî domîyenî. Çalakgêran bi siloganan va ‘heta ke tecrîd wedarîyeno ma kuçeyan de yê’.
Parlamentera HDPyî û Hemsereka KCDyî Leyla Guvene seba ke tecrîdo ke Rayberê Şarê Kurdî Abdullah Ocalanî bêro wedarnayene 197 rojî verê dest bi grevê vêşanîye kerdbî. Dima ra Nasir Yagizî dest pêkerdbî û çalakîya Yagizî zî roja 184. de dewam kena.
Çalakîya hepsîyan roja 159, çalakîya Îmam Şîş û 14 çalakwananê Strasbourgî roja 158, çalakîya Yûsûf Îbayî roja 132, çalakîya Fadîle Toke zî roja 124. de dewam kena. Heto bîn ra çalakîya parlamenteranê HDPyî Tayyîp Temel, Murat Sarisaç û Dersîm Dage zî bêmabêne dewam kena.
Hepsîyan ra 2 grûbî çalakîya xo açarnaye rojeyê mergî, grûba yewina roja 24. de ya. Heto bîn de Avûkatê Rayberê Şarê Kurdî Rezan Sarica û Nevruz Uysale seba ke Ocalanî de pêvînayîş bikerî, vizêr şîyî Îmrali.
Xeylê bajaran de çalakîyî
Vera tecrîdo ke Rayberê Şarê Kurdî Abdullah Ocalanî ser o yeno domnayene de çalakîyê girseyî dewam kenî. Kurdistanijî û dostê înan şaristanê Stockholmî yê Swêdî, bajarê Baselî yê Swîsre, bajarê Kolnî yê Almanya û bajarê Rennesî yê Fransa de kuçeyan de bî.
Çalakgêran dovîzê ke resimê Leyla Guvene û nuşteyê ‘Ma Sûrîye de zorê DAÎŞî berd, la ma Tirkîya de tepişte yê’ û dovîzê ke hêrişê polîsanê Tirkî yê vera dayîkanê çalakwanan de şermezar kerdêne ameyî berzkerdene. Çalakîyan de tim sloganê ke grevanê vêşanîye û rojeyê mergî rê wayîr vejênê ameyî eştene. Çalakîyan de siloganê ‘Ma pêro Leyla yê’, ‘Bêvengîye vindarnê’, ‘Biciwîyo Xoverdayîş’, ‘Biciwîyo Piştîdayîş’, ‘Ocalanî rê azadîye’ û ‘Ocalanî rê azadîye, Kurdistanî rê statu’ ameyî eştene û vilawekî ameyî vilakerdene.
Çalakîya Dêrsimî roja 17. de ya
Çalakîya roniştişî ya rêxistina bajarê Dêrsimî ya HDPyî ke semedê piştîdayîşê grevê vêşanîye û rojeyê mergî yê vera tecrîdkerdişê Rayberê Şarê Kurdî Abdullah Ocalanî, yena viraştene vizêr roja 17. de dewam kerde. Rasteê Seyîd Rizayî yê Dêrsimî de bi çalakîya roniştişî bale ancîyaye grevê vêşanîye yê ke rayberîya Leyla Guvene de yenê kerdene ser. Temsîlkarê partîyanê sîyasîyan û dezgehan, hunermend Metîn Kahraman û xeylî hemwelatijî beşdarê çalakîye bîyî. Çalakîya ke binê ablûqaya polîsan de reya 17ine ameye viraştene de ame vatene ke waştişê xoverdayoxan waştişê ma yê û heta bicaardişê nê waştişan do çalakîya ma bêro domanyene.
AMED