Pî Alîşan Îlkbahar ke badê bîyayiş DÎHA rê qisey kerd bi nîya behsê sebebê şîyînê qereqolî kerd: “Rîwalê bîyayenê dawayekê derheqê mi de, serva îmze eştişî ez şîya qereqol. Verîya ke ma biresê qereqol 3-4 gule vornay wesayîta ma. Lazê mi wesayît ra vejya, destê xo wedarna û va ‘Ez bîya dirbetin’. Badê êrişî lejkeran qereqol gule vornay dorme û hêgayan. Rîwalê gulevornayen hêgayê dewa Xoşan de veş vejîya. Mesût Îlkbahar ke wedarîya nêweşxane nêame xelesnayen.
Cenazeya Îlkbaharî Sazgeha Tipa Edlî yê Meletî ra amê giroten û berdîya Dersim. Seweta Îlkbaharî Cemxaneyê Xozatî de merasîm virazîya. Parlementerê HDP Erdal Ataş, Alîcan Onlu, îdarekarê HDP, hemşaredarê qezayanê Dersim, temsîlkaranê ÎHD û DHF ra pîya bi hezaran welatijî tewr bî.
Dersim 100 serrîyo dûştê faşîzmî dano piro
Cenazeya ke bi slogananê “Hêrsê mayan do kiştoxan bifetisno”, “Şehîd nêmirenê” berdîya hewşê Cemxane. Parlementer Onlu ke na ca de qisey kerd sozê tekoşînê dûştê faşîzmî da. Tabûta Îlkbaharî hetê hezaran kesan bi sloganan berdîya navendê qeza. Peycoy bi konvoyî cenaze berdîya dewa Pakîre. Bado girotenê helalî cenaze mezelxaneyê dew de amê definkerden. Parlementerê HDP Erdal Ataş ke îta de qisey kerd vist vîrî ke Dersim de şarî 100 serrîyo dûştê faşîzmî danê piro û malbatê Îlkbaharî rê serweşî waşt. Şêligo ke qereqolê dew ra vêrd ra bi qorneyan nêrazîbîyenê xo damûsna.
HBDH ra aşkerakerdis
Heto bîn ra Fermandarîya Wertex yê HBDH kî derheqê bîyayiş de zonayişan da. HBDH da zonayen ke 1ê Tebaxe seat 08.00î de mîlîtananê ci dûştê qereqolê Pakîre çalekîyeke viraşto û 3 lejker kiştîyê. Fermandarî da zonayen ke badê çalekî artêşî bi helîkopteran merdî û dirbetinê xo wedarnayê. HBDH da zonayen ke quwetê dewlet yê ke derbe werdî destpa gulevornayenê dorme kerdî. Na dem de wesayîteke sivîl kî raştê gulevornayenan amê û na ca de welatijeke sivîlî weşîya xo kerdo vindî.
HBDH aşkere kerd ke na çalekî serva vîrardenê alwozanê ci Sînan û Riza ke 6ê Gulane de şehît kewtîyê virazîya ya.
DÎHA/DERSIM