Koordînasyonê KJKyî serrgêra 40. ya ronîyayîşê PKKyî de vato ‘partîya ma ser nameyê merdimîye tayê erjê neteweyî, herêmkî û mîyanneteweyî xelq kerdî’ û wina vato: “Ma do serra 41. ya PKKyî de hîna zaf xover bidî û biresî serkewtişanê girdan.”
Koordînasyonê KJKyî serrgêra 40. ya ronîyayîşê PKKyî ser o îzehetêko nuştekî da û serrgêra PKKyî herkesî rê pîroz kerd. Koordînasyonî îzehetê xo de dîyar kerdo ke raştîya PKKyî raştîya şaran a, raştîya PKKyî raştîya merdimîye ya û vato ‘heqîqeta PKKyî heqîqeta cinîya azade ya’.
KJKyî îzehetê xo de serrgêra 40. ya ronîyayîşê PKKyî pîroz kerd. KJKyî vato ‘ma serra 40. ya partîya xo xopey de verda’ û wina dewam kerdo: “Wa serrgêra 40. ya partîya ma, sere de Rayber Apoyî rê, şehîdanê partîya ma rê, şarê ma yo welatperwerî rê û heme embazanê ma yê mewzîyan de yî rê pîroz bo.”
Îzehet de ameyo vatene ke ‘serrgêra ronîyayîşê partîya ma eynî wext de prosesê xoverdayîş, serkewtiş û xelqkerdişî yo’ û wina dewam kerdo: “Na mana de PKK ilmêko gird o, moral o, ehlaq o û têkoşînêko gird o. Raştîya PKKyî raştîya şaran a, raştîya PKKyî raştîya merdimîye ya. Heqîqeta PKKyî heqîqeta cinîya azade ya. 40 serrê ke derbaz bîyî, serrê ke ser nameyê merdimîye û cinîye de serkewtişê girdî ameyî qezençkerdişî yî.”
PKK hertim serkewto û bîyo hêvî
KJK îzehetê xo de bale anto hêvîya merdimîye ser û wina vato: “Partîya ma hertim ser nameyê merdimîye tayê erjê neteweyî, herêmkî û mîyanneteweyî xelq kerdî. PKK hertim rayberîya sosyalîzmê demokratîke kerda, bîya partîya cinîyan û vera şerêko gird de hertim payan ser o mendo. Vera PKKyî de heme dinya bibo yewe zî PKK hertim serkewto û îradeyêka ke nimuneya ci dinya de çin a, xelq kerda. Nêyî seba şarê ma ke aşiqê azadîye yo, benî hêvî. Nê 40 serrî hertim bîyî serrê serkewtişî. Nê 40 serran de qaso ke şorişê rizgarîya kurdan virazîyayo, hêvîya merdimîye zî ameya gandarkerdene.”
Ma do biresî serkewtişanê girdan
Koordînasyonî dewamê îzehetê xo de qala serra 41. ya PKKyî kerda û wina îzehetê xo qedênayo: “PKKyo ke her vîsta ci bi pîrozîyanê cîyayan derbaz bîyo, erjê muhîmî derbazê tarîxî kerdî û bîyo sebeb ke cinîyî ver bi azadîye şêrî. Ma bi na wesîle, şehîdanê xo yewna rey biminet vîr anî. Ma sozê xo dibare kenî ke ma do vera konseptanê hêrişan de xover bidî û cewab bidî hêrişan. Ma dîyar kenî ke ma do hîna zaf bibî PKKyij û Rayber Apoyî azade bikerî. Ma do serra 41. ya PKKyî de hîna zaf xover bidî û biresî serkewtişanê girdan.”