Her roje xeberê derheqê neheqîyê ke vera cinîyan de yenî kerdiş yenî rojeve. Labelê heto bîn ra cinîyê ke bihêz î û payan ser de vindenî zî estî. Cinîyî no het de debara xo kenî û xo muhtacê camêrdî zî nêkenî. Nê cinîyan ra yewe zî cinîya bi nameyê Kismet Ermîşe ya.
Kismet Ermîşe qezaya Findikli ya Rîze ra tupe gêna we û debara xo kena. Şîrketêko taybet ê tupe de xebetîyena. Kismet Ermîşe dîyar kena ke findiq û çay gêna milê xo ser û nika zî pê tupe debara xo kena. Ermîşe daye zanayîş ke hêzê cinîyan qîmê heme çî keno.
Kismet Ermîşa 50 serreyî qezaya Findiklî ya Rîze de cuyena û bayîyêka tupe de xebitîyena. Semedo ke karo ke kena xeylê zehmetî vînena, veng dana cinîyan ke wa cinîyî bar wegîrê û hewceyê camêrdan nêbê. Kismete dîyar kerde ke bi serran verê dewa Beydere de wexto ke mêrdeyê aye qehwe da xebitnayîş, tupe dewan de ameyênê vilakerdiş û winî nas kerdo û wina dewam kerde: “Ma semedê mektebê domanan ameyî bajer. Ma bayîyêka tupe akerd. Herçiqas ke kar zehmet o zî ma karê xo kenê. Mi bi mêrdeyê xo dir akerd. La mîyanê wextî de bî karê mi. 4 domanê mi estî. Wedaritişê tupe çîyêko xirab nîyo. Wa cinîyî bixebitîyê, hêzê înan qîmê heme çîyî keno."
Nêbenê raqîb benê destek
Kismete sîparîşê tupan yê muşterîyan dana milê xo ser û bena muşterîyan rê. Kismete dîyar kerde ke no semed ra xeylê kesî şaş benê û vanî dewe de mi çaye girewtêne milê xo ser, nika zî tupan gêna we. Kismete ard ziwan ke qeza de hîrê cinî no karî kenê û va ê yewbînan dir nêbenê raqîb. Kismete wina va: "Ez roje de 12 saetan xebitêna. Semedê nê karî hêzê fîzîkî qîm keno. Ez roje de mabêne 6-10 tupan gêna we."
EVRÎM KEPENEK /ŞÛJIN/RİZE