Hikmê 'qedexe' yê şima çinyo
Verra şarê Kurd herbê topyekun yê dewleta AKP rameno. AKP ya ke koyî de, verra gerîlayan netîce nêgirot, verê xo çarna hetê sûkan. Nika endî herb kuçe, mehle, qeza û bacaranê Kurdistan de yeno ramiten. AKP bi tanq û topanê xo, tîmanê teybet û çeteyanê xo erzena Kurdan ser. Nê çeteyî girêdayê Enqera yê. Zerreyê ci de rêxistinê dewşirme yê zey 'esetullah' 'hîzbullah‘ 'ocaxê osmanî‘ ‘tugayê teybet‘ û çeteyê DAİŞ zî estê.
Cayê ke AKP xo rê kerdê hedef, cayê ke weçînayinan de binkewta yê. AKP him qesasê-heyfê weçînayinan gêna, him hewl dana verniya waştena xoserey bigîro, him zî hereketê serbestî tehrîk kena û wazena bianco herbê do xorîn. Nayî ra Kurdistan de xeylê cayî giroto bin abluqeya eskerî û faşîzmî xo dana ramiten. Û wazena Bakûrê welat zî açarno zey wextanê herb yê Kobanê.
Dewleta zilimkar qezaya Amed Farqîn de mavêna 3-14ê Mijdar-Teşrîne de ‘qedexeyê vetişê kuçe’ îlan kerd û fermanê kiştişan da. Qeza de şeş aşmanê peynî de hikumeta zilimkar 6 reynî fermanê ‘qedexe’ da. Farqîn de zerreyê 12 rojan de terorê da pîl amê ramiten. Yê ke na terorê ra şahîdî nêkerdî, wa biewnê sûretê ke amey weşînayen yê Farqînî. Nê sûretî pêrokîn raştî rafînenê ver çiman. Netîceyê terora 12 rojî yê çeteyanê AKP de 8 welatijî amey kişten. Bi desan welatijî bî dirbetin. Nezdiyê 25 hezar welatijan netîceyê polîtîkayanê kolonyalîst yê dewlet goç kerd. Tenya kesê sivîl nê, herzewbîn hemseroka HDP û parlamenterê ci zî raştê hêrişan amey. Çiyê dê niyayîn zewbîn kotî, kamcayê dinya de qewimenê gelo?
Jew cayo bîn o ke verra zilmê dewlet xoverdano qezayê Mêrdîn Nisebîn o. Nisebîn de zî, badê fermanê ronayişê ‘qedexe’ çeteyê AKP kewtî hereket. 13ê aşmî ra na het quwetanê kolonyalîst, bi wesayîtanê zirxî girot bin abluqe. Tiya de zî heta nika 4 welatijî amey qetilkerdin, 15ê ci zî dirbetinê. Qeza de hêriş û terora çeteyanê dewleta AKP rameno.Tewr peynî de, dewleta gonîwerd qezayanê Amed Lîce û Hêne de zî bi desan taxan de fermanê ‘qedexe’yê vetişê teber da. Bi vatişê bîn Lîce û Hêne de zî fina herb-lej îlan kerd.
Cizîr, Farqîn, Nisebîn, Lîce… Nê cayî bi zanabiyen û bi hedef amey weçînayen. Lîce cayo ke hereketê serbestî yê Kurd PKK ame ronayen o. Nisebîn qeleyê xoverdayin, sembolê serhewedayinan o. Cizîr û Farqînî zî serva-qabê xosereya welat bedelê girdî da. Nê cayan de tenya weçînayinanê peyni de nê, wextê derg o ke tabelayê AKP zî nêmendê. Rewna ra yo ke, hikmê hiqûqê dewleta tirk nêravêreno.
Hikûmeta AKP rewna ra qerarê herb da yo. Hewl dana Kurdan bitersîno, îradeyê ci teslîm bigîro. Eke no nêbozî qetil bikero. Stratejî û planê ci tesfiyekerdişê Kurdê ke xoverdanê ser o. Verra nay çiyo ke bîro kerdin, xo ra şarê ma keno. Çi ke no şarî verra dişmenê xo serreyê xo nimiz nêkerdiş Kal û Pîr’anê xo ra musniya. Zey ke Sey Riza’yî va: “ma verniya şima de nimiz nêbî, wa şima rê bibo derd”. Winî ayseno ke dewleta zilimkar do no herbê tesfiyekerdiş gam bi gam vilayê pêrokîn cayan bikero. Nayî ra gune pêrokîn sûkê Kurdistan verra na faşîzmî werzerê ser payan. Çi ke na abluqeya qilerîn encex bi rihê xoverdayişê Kobanê û Şengal şena-besekena bîro şikiten.
