La çi heyfo ke heyana ewro seba nê faîlê qirkerdişan ra raşteyî de çekî zî çînî yo. Seba ke heyana ewro nê faîlî nêvejîyay raşte zî û ana aseno ke faîlê qirkerdişan xo bi xo dayo dest. Nê hewa yew rewşe qet yew dinîyayî de nêasîya yo hinde qirkerdişê girdî bivirazîyê û raşte de zî faîlê nê qirkerdişan çinî yo.
Bi rewşa eşkerayî ra dîyaro ke faîlê heme nê qirkerdişan hukimata AKP ya. Eynî wexti de zî seba nê qirkerdişan ra şarê ma, dezgeyê û partîyê ma zî sûcdar î. Verê verkan qetilkar AKP yew bi yew ciwanê kurd bi rewşa aşkerayî ra qetil kerdî. AKP ewnîya ke çi qirkerdiş bivirazo nê heme qirkerdişî înan rê kar mend.
AKP ra hesab nêpersay
Hînê tira dime zî qetilkar AKP bi rewşa eşkerayî ra qirkerdişê Roboskî viraşt. Seba qirkerdişê Roboskî ra ganî 7 hebî hukimatan îstîfa bikerdê û hînê verade istîfa kerdişê hikûmatî. Na ray zî AKP nê qirkerdişî xo rê meşrû kerdî û peyê nê qirkerdişan dê Roboskî de vindertî. Şarê ma, dezgeyê sazîyê ewta de en xetayê şaşî kerdî AKP ra hesab nêpersay.
Provokasîyonê girdî virazîyay
Seba qirkerdişê Roboskî ganî daîmî rewşa şînî bitepiştê û heyana ke berpirsîyarê nê qirkerdişê Roboskî muhakeme bibînê. No hewa qirkerdiş bes nêbe hînê nayra zî Parîs de qirkerdişê hîrê sîyasetmedar cenîyan virazîya û ancî zî peyê nê qirkerdişê Parîsî Tirkîya hukimata AKP vejîya. Hînê tira dime zî Mersîn, Edene de, Çewlîg de Agirî de, provokasîyonê girdî virazîyay.
Tewr qirkerdişo gird zî Amed de raşteyê mitînga îstasîyonî de virazîya. Hema zî seba qirkerdişê mitinga îstasîyonî ra raşte de faîl çinî yo. Bi tena faîl yew kes aseno peyê eyî de kam esto dîyar nîyo. 9’ê hezîranî de bi raşteyî de hîrê sîyasetmedarê kurd qetil kerdî ancî zî faîl çinî yo.
Qirkerdişê hovaneyî virazîya
Serkewtişê Girê Sipî ra dime hêrişê Kobanî de ancî yew qirkerdişo gird virazîya nê qirkerdiş de hema hema heme kes zî sivîlî bî. Ancî zî peyê nê qirkerdişî de Tirkîya û hukimata AKP vejîya. Hema seba ke nê rewşa heme qirkerdişan teze ya. Ray na zî Pirsûs ya Riha de hemverê ciwananê sosyalîstan ra qirkerdişê hovaneyî virazîya. Senî hewa raşteyî de nê qirkerdiş virazîya no warî de hînê aqilê merdimî nêgênî yo.
No warî de bi nameyê dewleta AKP ra Davutoglu aşkerayî dano û veng dano heme partîyan ra vano bêyrê ma hemverê terorî mutakap virazê.
Davutoglu hema zî nameyê DAIŞ î nêdano
Davutoglu nameyê nê terorê DAIŞ î zî nêdano û eynî wexti de zî HDP ewta de tehdît keno û vano: “No hawayî ganî HDP xo muqat bikero.” Davutoglu hem nameyê DAIŞî nêdano û hem zî HDP tehdît keno sankî AKP nê qirkerdişê hovaneyî nêviraşto û çimê xo nêgirotî hema zî pişkîn pişkîn HDP tehdît keno.
No warî de mademkî AKP nê qirkerdişî girdî nêviraştî û wertaxê nê qirkerdişan nêbîya se, no warî de ancî zî heme tewir ra AKP berpirsîyarê nê qirkerdişan a. Heyana ke nê heme qirkerdişî dîyar nêbêy se û her wext qetilkar AKP ya.
7 hebî qirkerdişê gird virazîyay
Nika zî seba pawitişê esasî ra şar ganî xo heme tewir ra xo bipawo û pawitişê esasî biviraz o. Hînê sewbîna tewr seçenek zî nêmendo. Ewta de şar hînê qurbanê mêşnayî nîyo. Ewta de hukimata AKP heme hewa ra rîyê xo sîya kerdo û hemverê heme qirkerdişan ra pîrîm dayo û bi rewşa aşkerayî ra paştî û destek dayo qetilkaran û tecawizkaran ra.
Nika ra pey hînê pawitişê esasî meşrû û heqdar o. Pawitişê esasî bi rewşa esasî û xozayî ya. Hem şarê kurd û hem zî şarê tirk hînê eşkeno ke bi rewşa xozayî û esasî ra pawitişê xo bikero. Çimkî heyana nê aşma nizdîyan ra tam 7 hebî qirkerdişê girdî virazîyay. Hînê seba pawitişê esasî ra îtîbarê AKP qedîya yo. Enkay ra pey hînê bi rewşa dîrokî ra AKP qetilkar yena hesibnayîş.