Hikumeta AKP serva ke şaredarîyanê DBP xesp bikero, Meclîsî ra qanûna ke kerdo hedre ewro yena munaqeşe kerden. Hemserokanê HDP û DBP hikumeta AKP aya kerd û aşkere kerdî ke iyê dê nêviradê ke îradeyê şarî bîro xespkerdiş.
Qanûna ke AKP qandê xespkerdişê şaredarîyanê DBP kerdo hedre, ewro Meclîsê Tirkîye de do munaqeşe bibo. Goreyê na qanûnî, bi nameyê poşdayişê terorî de, hemşaredar, encumen û azayê meclîsî bi rehetî wezîfe ra bigeyrîyê û hurendîya înan de kayyûm, bi nameyê bînî wezîfedarê dewlet tayin bibo. Hedefê esasî yê na qanûnî, xespkerdişê îradeyê şarê kurd û destvistinê şaredarîyanê DBP yo.
Qanûn leteyê qirkerdişê siyasî yo
Hemserokê pêroyin ê HDP Selahattîn Demîrtaş, Hemseroka pêroyin ê DBP Sebahat Tuncel û Hemşaredara Amedî Gultan Kişanak vera enê hewldayenanê AKP, Amed de damûstayîn day çapemenî. Hemşaredara Sûka Pîl yê Amed Gultan Kişanak verikîn qisey kerd û da zonayen ke AKP wazena şaredariyan bi dest bifîno û heme cayan bigîro binê qontrolê xo, la belê iyê nêviradê AKP îradeyê şarî xesp bikero. Hemseroka pêroyin ê DBP Sebahat
Xîzmetê krîzî keno
Tuncel zî vist vîrî ke qanûno ke AKP kerdo hedre bivejîyo zî nêvejîyo zî, çiyê îfade nêkeno û wina va: “No qanûn do bê xorîkerdinê krîzî xizmetê çiyê bînî nêkero. Leteyê siyasetê qirkerdişê siyasî yo. Eke sermîyanê dewlet vanê ma êşkenê bi kayanê zor û zordarî peynîyê kurdan biyarê ê xo bi xo xapînenê.” Tuncel ard ziwan ke, ê dê heme hetan ra vera siyasetê xespkerdişê AKP xo ver bidê û qandê nay zî, veng da heme kurdan û çormeyanê demokratîk.
Şima nêşenê îradeyê şarî xesp bikerê
Peycoy Hemserokê pêroyin ê HDP Selahattîn Demîrtaşî qisey kerd û bi ziwanê tûnî hikumeta AKP aya kerd. Demîrtaş‘î vist vîrî ke, AKP wîjdan û exlaqê siyasî kerdo vinî û wina vat: “Ma çi vanê serva silametîya welatî vanê. La belê bi sebebo ma ra û mûxalefet ra yeno, AKP goş nêdana. Eke hetanî nika goş bidaynî ma, iyê nêkewtayîbî pey kesê gilêjikin ê îdîa keno her şew hewnê xo de Hz. Muhammedî vîneno.
Demîrtaş’î eleqe ant xizmetanê şaredarîyanê DBP ser û wina va: “Ma çîyanê rast vanê. Qandê (serva) vetişê qanûnî, amorê giştanê şima qîm keno. La belê şima nêşenê îradeyê şarî bi fiîlî xesp bikerê. Eke şima fikiriyenê şaredarînê ma kar nêkenê, hodrî meydan, bêrê cayo ke şima vanê şaredarî kar nêkenê, weçînayinanê rew-wextî virazê.”
Şaredarîyanê AKP xîzmetê Gulenî kerd
Demîrtaş’î vist vîrî ke şaredarê sûka gird ê Enqere Melîh Gokçekî îtîraf kerdbi ke, arsay dayê cemeatê Gulenî û va: “Eke kayyumî tayîn bibê, gerek verî Enqere ra dest bikerê ci. Sernî de Enqere, şaredarînê Estenbol, Qeyserî û Konya, pêrinê şaredariyanê AKP kayyum wezîfedar bikerê. Çike hetkarînê tewr vêşî şaredariyanê AKP desteg da cemeatê Gulen o.
Badê qiseyan Demîrtaş, Tûncel, parlementer û hemşaredarî serva kombîyayiş ravêrdî bana şaredarî.
DÎHA/AMED