Hêzê Sûrîyeya Demokratîke (HSD) bi îzehetêko nuştekî dîyar kerd ke ê merhaleyo peyên yê Hemleya Firtineyê Cizîrî dayo dest pêkerdene. Îzehet qezaya Şedadê de ame dayene û xeylê fermandar û rayberê eşîran beşdarê îzehetî bîyî.
Îzehet hetê Lîlwa Abdullahe ra ame wendene. Îzehet de ame dîyar kerdene ke hêzê înan par seba ke Dêrazor û Hesekê azade bikerî Hemleya Firtineyê Cizîrî dabî dest pêkerdene û wina dewam kerdo: “Çarçewaya hemle de hêzê ma û yê Koalîsyonê Mîyanneteweyî pîya operasyonê hewayî û bejayî viraştî. Netîceyê operasyonan de bi hezaran kesî terorê DAIŞî ra ameyî xelisnayene. Tena herêma Hecînî destê çeteyan de menda.”
Dewamê îzehetî de wina ameyo vatene: “Hêzanê ma merhaleyo peyên yê hemle zî 10ê êlule de dayo dest pêkerdene. Ma do beldeyê Hecîn, El Sosa, El Şefa û dewanê dormeyê azade bikerî. Ma do warêko 10 kîlometre hîra yo û 35 kîlometre derg o azade bikerî û hemleya xo temam bikerî. Ma sey Hêzê Sûrîyeya Demokratîke rojhelatê Firatî de terorî çinî bikerî. Hêzê ma do heta ke wezîfeyê xo bîyarî ca, do hemle bidomnî.”
ANHA / HESEKÊ