Wexto ke Serektîya TBMMî Îsmet Yilmaz qezenç kerd ra dima koalisyona AKP-MHPî ame rojdem. La kulîsê sîyasî de behsa şer, wedaritişê weçînayîşan û dîktatorî yeno kerdiş. Yanî senaryoyek no hawa esto.

MHP hem serektiya meclîsî da AKP û hem zî hetê hêrişkerdişê Sûrîyeyî de paşte dano ci. Bloka faşîst-kanperst vurîyena tifaqa şerî ya ke mintiqe gonî ra bielawo. MHP ya ke serektîya Meclîsî da AKPî, nika paşte dana polîtîkayanê hukimatî ya şerî û no hawa koalîsyon wazena. MHP vana wa ravereya aşîtî biqedyo û bêrayîrî û Erdoganî ra hesab bêro persayîş. Rayna semeda korîdora kurdan ke mintiqe de awan nêbo nêwazena Tirkîya bidekewo Surîye. 

Yanî slogana MHPî no hawa yo. Davutoglu semeda wezareta pawitişî ke Îsmet Yilmazî ra dima veng mendo zî vat bi wekaleten ney do bi asaleten tayînkerdiş bêro viraştiş. La ger ke hukimeta demkî zey hukimata mende tayînkerdişê bi asaleten bivirazo aye wext no yeno manaya şerî. No zî nawneno ke Tirkîya eşkeno her kelî de bikewo şer. 


Îqtîdara xo pawiyena

Serekomar Erdogan ke bedelê êy çi beno wa bibo wazeno desthilatdarîya xo bipawo hedreyîya plana ke di merhaleyî ra virazyeno keno. Verê bi paştedayîşê gonî, hesirê çiman û hestê nîjadpawitoxî weçînayîşan newe ra bivirazo û dima zî bi mehnekerdişê şerî weçînayîş taloq bikero. Koalîsyona AKP-MHP ke demo ameyoxa Tirkîya de asena zî encax eşkena Tirkîya bidekewo şerî. 

Nê wirdî partîyê ke wazenîy artêşa Tirkîya bidekewo Sûrîye û Rojhilatê Mîyanên de vernîya qetlîyama mezheban bivecyo. MHP ya ke serektîya Meclîsî îkramê AKPî kerd paşte dana polîtîkayanê şerî ya AKPî zî. Semeda ke serektîya Meclîsî ame weçînayîş û divana serektî zî dîyar bi ra dima 45 rojê ke vernîya ma de qederê Tirkîya sero rolekê muhîm kay keno. Çimke ger ke koalîsyona AKP-MHPî nêvirazyo aye wext serekomar Tayîb Erdogan eşkeno goreyê qanunê 116’ine ya makeqanûnî vaco ‘Komîsyona wezaretî vengê temînatî nêgirewto’ û bi şêwiryayîşê serekê Meclîsî eşkeno weçînayîşan newe ra bikero. 


Hadreyeya şerî

No selahîyeta ke heta nika hetê ti serekomarî ra nêameyo xebetnayîş serê meclîsî seyî şûr leqeno. Serekomar eşkeno bi qanûnê 78’ine ya makeqanûnî ya ke vano; ‘Semeda ke şer esto weçînayîşan taloq keno’ û qanûnê 92’ine ya makeqanûnî ke vano; ‘Demo ke Meclîs betlane de yo îlankerdişê şerî’ no selahîyetan hemverê Meclîsî bixebetno. Talûkeyek no hawa esto. Xora hedreyîya şerî domyeno û TSK zî sîndoran de bi pêserkerdişî no hedreyîyan virazeno. 

Adem Hutut ke Qomîtanî arteşa 2’ine ya ke Tirkîya semeda şerê Sûrîye hedre tewşeno yo, semeda ke mintiqe de teftîş bikero şi sîndor. PYD zî no sero aşkera da û vat ke ger ke hêrişek semeda mintiqe bibo, do bandora na hêrişî herem, mintiqe û mîyan netewî de zî virazyo. Na semed ra ma seyî hêzê YPGî semeda verpersdayîşê hedre yî. 


 NAVENDA XEBERAN



Ser sînorê seba hadreyaya hêrişî pêvînayiş


Serekvezîr Davutoglî zî meqama fermî ya serekvezîrtî de nêzîkê yew saet bi serekê artêşî Necdet Ozel û musteşarê MÎTî reyde pêvînayîş kerd. Qomitanê artêşê 2’ine Adem Hutut zî şi Kîlîsê ke sîndorê Sûrîye sero yo. Hudutî tîya de tayî cigersayîş kerd û derheqê dewa Akçabaglar a Efrînî ke mîyan de PYD û mintiqeya Çobanbeyî ke mîyan de DAIŞ serwer o agahî girewt. 

No cigerayîş ra dima Hudut vîyart walîtîya Kîlîsî û walî Suleyman Tapsiz rey de pêvînayîş kerd. Semeda halê îstîsnayî Merzîfon, Eskîşehîr û Balikesîrî ra semeda hêrişkerdişê mintiqeyî 20 hebîy teyareyê F-16’î ardîy qerargeha teyaran ya lejkerî ya Amedî. 

Yeno vatiş ke teyareyê ke mintiqe de firayîşê ke semeda kişfkerdişî kenîy, semeda pirodayîşê warzîyayîy û çîyo neyînî ke biveynî zî eşkenî bikîy hedefê xo. Semeda têgerayîşê ke mintiqe de esto temamê destûran ameyo warzîyayîş. Bi teyaranê bê merdiman çîyo ke mintiqe de qewimyeno ca de erşawîyeno Enqere rê û lejkerî zî kendişê çalan domnenîy.