Parlamentera HDPyî ya Riha û Warezaya Rayberê PKKyî Abdullah Ocalanî Dîlek Ocalane derheqê Serrgêra 18. ya Komploya Mîyanneteweyî û tecrîdo ke Rayberê Şarê Kurdî Abdullah Ocalanî ser de yeno meşnayîş de qisey kerde.
Dîlek Ocalane vist vîrî ke ‘Abdullah Ocalan 18 serrî yo ke Girawa Îmrali de bin tecrîdêko girankerde de yeno tepiştiş’ û wina va: “Ma pratîkêko demokrasî û huqûqî çinî hesibneno reyde rî bi rî yî. Gever, Nisêbîn, Cizîr û Sûr de bebekê ke hîna pîzeyê dayîka xo de bîy, ameyî qetilkerdiş. Cenazeya dayîkanê ma yê 70 serreyîyan bi rojan rasteyan de mendî. Nê heme tecrîdo ke Îmrali de yeno meşnayîş ra girêdaye yî.“
Do veng bivejîyo
Dîlek Ocalane bale ante teşebusê derbe yê 15ê temuze ser û wina va: “Etiryayîş û hêrso ke 15ê temuze ra dima komel de ame xelqkerdiş, nika hîna zî estena xo pawenî. Yê ke bî sebebê nêyî û welat ver bi kaos û krîzî berd, hukmatê AKP yo. Her roje polîtîkayanê xo yê şaş zêdenenî. HDPyo ke hetê legal de sîyaset meşneno, xebatê ci yenî îlegalîzekerdiş. Senî ke 18 serrî verê planê komplo veng ameyî vetiş, do ewro zî veng bêrî vetiş.”
Dîlek Ocalan va ‘Ocalano ke hetê bi mîlyonan kesan sey îrade yeno qebulkerdiş, bin tecrîdî de yo’ û wina dewam kerde: “Tecrîd çîyo ke nê prosesî xitimneno yo. Nê prosesî kam xira kerd? Çira berê Îmrali padaye yî? Senî pêvînayîşê hepsîyêk bi avûkatê xo reyde yeno astengkerdiş? Kam do hesabê nêyî bido?.”
Dîlek Ocalane qiseykerdişê xo de va, “Ma cinîyî do vera tecrîdî de rayberîya têkoşînî bikerî û wina va: “Îqtîdarî merdiman rê bêxera xoverdayîşî sewbîna alternatîf nêverdayo. Eke şînê vernîya nê xoverdayîşî de bivinderî, wa bi tanq û topê xo bêrî, bivinderî. Heta ke Birêz Ocalan azade nêbo, komel zî azade nêbeno.”
ŞÛJIN/AMED