Demê peyênan de Zindanê Tîpa Myî yê Manîsa zî tede xeylê zindanan de hepsîyan ser de hûmartişê serê payan yeno ferzkerdiş. Kesê ke prosesê derbeya leşlerî ya 1980î de ameyî tewqîfkerdiş qala caardişê serê payan de hûmartişî kerdî.
Derheqê babete de mexduran ra Alî Yildirimo ke derbeya leşkerî ya 1980î de ameybi tewqîfkerdiş û Zindanê Buca yê Îzmîrî û Zindanê Hûmara 5. yê Amedî de mendo qiseykerdişê xo de wina va: “Aye tarîx ra heta nika hepsîyê sîyasî bîyî wayîrê kulturêko xoverrokar. Wexto ke qala zindana yeo kerdiş sere de Kenan Evren û Esat Oktayî yenî mi vîrî. Eke feydeyê caardişê aye wextan bibayêne do heme kesan ra ver Esat Oktayî ser bikewtêne. Labelê tarîx xeylê çîyan musneno mendiman. Ferzkerdişê hûmartişê serê payan, îşkence û sewbîna xeylê tewir caardişî Zindanê Amedî de ameyî kerdiş û sey lekeya sîya ripelê tarîxî de ameyî nuştiş.”
Sîstem yew o
Bahattîn Ozeno ke mabenê tarîxanê 1980-90î de Zindanê Amedî de mendo, çîyê ke aye wextan de qewimîyayî sey wexşet bi name kerd û va: “Hûmartişê serê payan raybazê rutîn yê îşkenceyî yo. Zindanê Amedî de her tewir îşkence estbî. Eke nika zî nê çîyî bibî o wext sîstem yew o. Sîstem sere de verê xo dano hepsîyan. Hedefo yewin binpaykerdişê kamî û şexsîyetê merdiman o. Ma do piştî bidî embazanê xo yê ke çalakîya grevê vêşanîye de yî û reaksîyon nîşan bidî nê caardişan.”
Yusuf Ozmeno ke badê derbeya 12ê Êlule ameyo tewqîfkerdiş raştê îşkenceyê xeylê giranan ameyo û qiseykerdişê xo de wina va: “Hûmartişê serê payan parçeyêko îşkenceyî yo. Ez zindanê Buca, Aydin û Stenbolî de menda. Aye wext seke şivan bêro pezanê xo bihûmaro bi giştan ma ameyêne hûmartiş. Labelê hepsîyê sîyasî tarîx ra nata xover danî. Doman, merdim û embazê ma bêwayîr nîyî.”
ÎZMÎR