Goreyê cigêrayîşê Platformê Ma do Qetilbîyayîşê Cinîyan Bivindarnî, 5 aşmanê destpêkê serra 2017î de 182 domanî raştê îstîsmarî ameyî.
Tena aşma çileyî de 34, aşma sibate de 14, aşma adare de 63, aşma nîsane de 33 û aşma gulane de 38 domanî raştê îstîsmarî ameyî. Seba vernîgirewtişê îstîsmarî Tirkîya de ti gamî nînê eştiş û kesê ke îstîsmar kenê bi cezayanê tayan teşwîqî îstîsmaranê neweyan yenî kerdiş. Tirkîya de huqûq çin o û kesê ke sucan kenê bêceza yenê verdayîş.Babete ser o Şêwirmenda Psîkolojîkî ya Pispor û Sereka Heyetê Îdareyî ya Komeleya Bîr Îzî Ozlem Mumcuogluye qisey kerde.
Ganî nika ra tedbîrî bêrî girewtiş
Mumucuogluye qala cezanêkerdişê îstîsmarî kerde û wina va: “Huqûq cesaret dano îstîsmarkaran. Çimkî îstîsmarkarî zanê ke ceza nêdîyeno înan. Cigêrayîşê TUÎKî de zî hûmara îstîsmarkerdişan zêde bîya. Goreyê mi sebebê na zêdebîyayîşî huqûq o. Çimkî huqûq çin o. Ganî heme hetê komelî bêrî têhet û seba çareserî sîstemêko newe awan bikerî. Bi no hawa keyeyê domanan zî do bêrî perwerdekerdiş. Zanayîşê keyeyê domanan xeylê muhîm o. Seba ke îstîsmarê neweyî nêbî, ganî nika ra tedbîrî bêrî girewtiş û xebatî bêrî kerdiş.”
SADÎYE ESER/M. DOGRU / DÎHABER/STENBOL