Bakûrê welat de dewrê da newî, hamleyê da newî despa kerd. Şarê Kurd gam bi gam îdareyanê xo yê xoser îlan keno. Cayanê zey; Cizîr, Sîlopî, Gever, Farqîn, Lîce, Nisebîn, Wan, Bazîd, Gimgim, Kop, Xîzan, Elîh, Edene de şarî îradeyê xo yê cewherî beyan kerdî. Îdareyê xoser yenê çi mane? Modelê xosereya demokratîk, ya zî îdareyê cewherî projeyê ciwyayişê azad o. Îradeyê hometî yo. Nayî ra kes şeno zey hemleya demokratîkbiyayin biname bikero. Rejîmê antî-demokratik yê tirk se serrano pêrokîn qeraran Enqera de gêno û şaran rê ferz keno. Derheqê Alewiyan de, Ermeniyan de, Kurdan de, Ceniyan de, gencan de goreyê xo qeraran gêno û vistneno dewre. Qeraro ke serva herema Karadeniz gêno, wazeno Ege de zî, Kurdistan de zî eynî qerarî ferz bikero. La hewcedariyê pêrokîn hereman ciya yê. Nayî ra, modelê îdareyê xoser serva tirkiye zey derman o. Îdareyê cewherî veng û rengê pêrokîn civakî yo. Hewcedariyê kancî heremî çiçîyo, kesê ke a herem-suk de ciwyenê îyê de bi xo qerar bigîrê. Her herem do bi reyanê xo meclîs û komunanê xo biweçîno. Qerar do cor de nîro giroten, cêr ra hetê cor bîro giroten. Endî şarê Kurd zî wazeno qederê xo bi xo beyan bikero. Kurdî endî esker, polîs, qeymeqam, waliyê dewlet nêwazeno. Verra hemleya îdareyê xoser' sermiyanê dewleta zilimkar kewtê tersê da gird. Cok ra bi tanq, tifing û topan hêrişê îradeyê şarî kenê. Çi ke, rewabiyîna no projeyî do dêsanê antî-demokratîk yê rejîmî biwelişno. Vengê û tekoşînê waştişê demokrasî do hewna vêşî berz bo.
Erdoğan û çeteyê ci demokrasî ra tersenê. Sîstemê da demokratîk de Erdoğan nêşeno dîktatorî û hegemonyaya xo biramo. Nayî ra pêrokîn quwetê dewlet seferber kerdê û hewl danê ke verniya na hemleya demokratîk bigîrê. Erdoğan'î zey serranê '90'î çete û şebekeyê tarî yê binameyê 'tûgayê Bolu, 'tûgayê Efeler, 'tûgayê Bora' serva gonîrijnayin, serva înfazanê newî riştî Kurdistan. Xo ra nê çeteyan zî Gever de, Amed de, Cizîr de, Wan de destpa kar kerdî.
Dîktatorê dergî no atmosferê herbî de qerarê 'weçînayinanê rewî' da û 1'ê Mijdarî de weçînayinî viraziyenê. Dîktatorî îrade û netîceyê weçîntoxan yê 7'ê Hezîran'î çinî hesibna û derbe kerd. Wazeno heta ke bibo 'serwezîr' na darbe dewam bikero. Serva îxtidara xo pêrokîn welatî kirêşna kaos û ver kaşî. HPG bîlançoyê jû aşmî aşkere kerd. 24'ê Tîrmeh ra tepya nezdiyê 500 esker, polîs û tîmê teybet kişiyay. AKP ya ke hewl da ser nê cenazeyan de siyaset biramo nêresya hedefê xo. Çi ke nêrazîbiyenê malbatanê cenazeyan verra Erdoğan'î û AKP bî vêşî.
Dîktatorê derg û çeteyê ci yê ke kişta şarî de qirediyê xo qedînay, wazenê şansê xo reyna-fina ra bicerbnê. Gune cepheyê sosyalîst yê tirkiye zî verra na dîktatorî tewrê hemleya xoverdayin û xoserey yê Kurdan bibo. Gerek Alewî, sosyalîstî, cenî, emegdarî, Kurdî, Ermenî, Asûrî, Tirkî û pêrokîn muxalîfî onca bin banê HDP de telewe bibê. Gerek herkes nayî fehm bikero; endî tirkiye biya didi lete. Jew cephe de rejîma dîktatorî ya faşîst esta, cepheyê bîn de zî Blokê demokrasî esto. E ke fitrat û karakterê dîktatoran de zilm, zorvaji, qetlîam û kiştiş esto se, yê şaran de zî xoverdayiş, îrade û serkewtiş esto.
Bakûrê Kurdistan, bi projeyê 'îdareyê cewherî, xosereya demokratîk înşa keno û şoreşa xo virazeno.