Şarê êzidî 3ê tebaxa 2014î de badê ke pêşmergeyê PDKyî remayî û êzidîyan bêpawitiş verdayî, raştê qirkerdişî ameyî. Çeteyê DAIŞî bi hezaran welatîyî remnayî û qir kerdî. Netîceyê xoverdayîşê hêzê YBŞ, YJŞ, HPG û YJA Şengal destê çeteyan ra ame pakkerdiş. Êzidîyê Şengalî dest bi rêxistinkerdişê xo kerdî û meclîsê xo yê Şengalî awan kerdî. Awankerdişê meclîsî, gama yewine ya Îdareyo Xoser yê Şengalî bî. Babete ser o Endamê Heyetê Îdarekarî yê Meclîsê Şengalî yê Ewropa Beşîr Êzidîyî qisey kerd.
Êzidîyî va ‘şarê êzidî raştê xeylê zulm û zordarîyan ame’ û wina dewam kerd: “Hedefê DAIŞî o bî ke heme mezheb û dînê herême çinî bikero. Yê ke vatêne ‘ma şima pawenî’ ma raştê îxanetê înan ameyî. Ma zî seba ke bişînbî ameyoxa xo awan bikerî, Meclîsê Êzidîyan yê Şengalî awan kerd. Badê ke ma mîyanê xo de xo rêxistine kerd, ganî ma xebatê xo yê rêxistinkerdişî bidomnayênê û şarê xo yê teberî zî rêxistine bikerdênê. Cok ra ma Meclîsê Êzidîyan yê Ewropa awan kerd.”
Beşîr Êzidîyî dewamê qiseykerdişê xo de va ‘Îdareyo Xoser yê Şengalî waştişê şarê ma bî’ û wina domna: “Îdareyo Xoser hetê êzidîyan ra ameyo weçînayîş û temsîlkarîya êzidîyan keno. Qerarê ke nê meclîsî ra vejîyenî, yê şarê ma yî. Ma şarê xo yo zere û teberê welatî ra hêvî kenî ke wa dormeyê Îdareyo Xoserî de kom bibîy. Ganî yewîya xo xurt bikerî ke bişînbî Şengalo xoser û azad awan bikerî. Ma wazenî wa her kes piştî bido ma.”
EZDEŞÊR HEBÎB/ANHA/TIRBESPIYÊ