Reîscûmhûrê Tirk Tayîp Erdogan ke qiseyanê xo de behsa muhîmîya ziwanî keno, heto bîn ra fermana girotişê televîzyonê domanan (qeçek) Zarok TV da. Hemserokê Enstîtuya Kurdî yê Stenbolî Samî Tanî na jû zey bêhirmetî biname kerd. Tanî vist vîrî ke vatişê Erdoganî pê nêgênê û va, ‘Erdogan ewro çiyekê vano, meşt zî dûştê nê vatenanê xo çiyekê bîn vano.’
‘Îdeolojiya Erdoganî Tirkperestîya’
Samî Tanî hayr ant vatenanê Erdoganî yê ‘ganî pêro doman û wendekarî mekteban de 10 qiteyê Sirûda Îstiklalî bimuse’ ser û wina dewam kerd: “Sirûda Îstiklalî de xêlê hetî estê. Jû het kişta ziwanî yo. Kişta bîn zî meseleya îdeolojîk a. A ke Erdogan eleqedar kena zî kişta îdeolojîk a. Na îdeolojî zî, îdeolojîya Osmanîya newî û Tirkperestîya. Ma na îdeolojiyê Sirûda Îstiklalî de zî rind vînenê.” Tanî vist vîrî ke îdeolojîya dewlet ser Tirkîtî û Îslamiyetîyê avey şona û aşkere kerd ke dewlet sîyaseta Tirkîtiyê û Îslamiyetîyêser şarî ferz kena.
‘Wazeno tenya vengeke bivejyo’
Samî Tanî hayr ant ser çapemenîya hetkar ê hukumet ser û wina va: “Medyaya tirk nika bîya navendekê îdeolojîk. Rîwalo ke Erdogan pirrengî û pirvengîye qebûl nêkeno, nêwazeno vengê cîya bivejyê. Ser na esasî Erdogan destûr nêdano kesî ke vengê xo berz bikerê.” Tanî girotişê Zarok TV zey bêhirmetîya Erdoganî ya verra kurdan, ziwanê kurdî, domanê kurd û ameyişê kurdan hesibna. Verra na zînîyeta înkar û îdeolojîya Tirkperestîye Hemserokê Enstîtuya Kurdî yê Stenbolî Samî Tanî veng da şarê kurd ke dawaya xo ra fek meviradê û va, ‘Ganî ma goreyê slogana xo ya ‘her keyeyêk mektebek’ hereket bikerê, xebat û plansazîyanê xo plankerdişê xo goreyê nayî virazê û seba domananê xo keyeyanê xo bikerime mekteb.’
DÎHA / ENQERA