5ê Nîsan 2015î ra na het, bi Rayverê Şarê Kurd Abdullah Ocalan’î ra pêdiyayin nêviraziyenê. 27ê Tîrmeh 2011î ra na het zî pawitoxî nêşkenê şirê Îmrali. Buroyê Hiqûq yê Asrin, derheqê Îmrali de damûstayîn da û aşkere kerd ke, derheqê weşiya Ocalan’î de ê bi fikarî yê.
‘Gelo tayn çî yenê nimiten’?
Pawitoxanê Ocalan’î ra Îbrahîm Bîlmez o ke ajansê DÎHA rê qisey kerd, vist vîrî ke, ê derheqê muwekîlê xo de nêşkenê xeber bigîrê. Bîlmez’î vist vîrî ke, muwekîlê îynan Nasrûllah Kûran û Çetîn Arkaş yê ke Îmrali de yê, rişiyayê girotxaneyanê bîn, la midûrê girotxane cewab û zonayişî nêdano ma. Bîlmez’î va: “Ma zonayişî girotî ke, Nasrûllah Kûran berdiyê girotxaneyê Sîlîvrî. Ma şî Sîlîvrî, la ma nêşa ey bivînê. Îbrahîm Bîlmez’î persa ‘eceb ma ra tayn çî yenê nimiten? Kerdenê do xiravîn esto, muwekîlanê ma rê îşkence kerdî eceb? kerd.
Ocalan xo nêdano şixulnayiş
Bîlmez’î hayr ant tecrîdê hiqûqî û siyasî ser û vist vîrî ke, mektûbê ke rişiyenê Îmrali dest danê ser. Ebi telefon nêşkenê pêdiyayin virazê. Ewja de her çî bi înisiyatîfê dewlet rameno. Bîlmez’î va, gune dewlet birêz Ocalan silasnayba. Ocalan xo nêdano şixulnayiş. Nê polîtîkayî xîzmetê Tirkiye nêkenê.
Polîtîkayê Îmrali benê wişk
Pawitox Îbrahîm Bîlmez’î vist vîrî ke, 17 serriyo, çiwext ke dewlet ‘polîtîkayê tîvarî’ vist dewre û tansiyon bi berz, o wext polîtîkayê dewlet yê Îmrali zî bî wişk. Bîlmez’î da zonayene ke, eke dewlet îradeyê çarekerdin damisno, birêz Ocalan zî serva haştî û demokrasî do her çî bikero.
Îbrahîm Bîlmez’î ard ziwan ke, nika onca ageyriyayime tabloyê serranê 90î. Ma ebi tabloyê do tarî ra, rî bi rî yê. No tabloyî ra raya vetiş, tepiştiyê destê haştî yê Ocalan’î yo.
DÎHA/STENBOL
HDP tecrît kirêşt meclîsî
Heta bîn ra, HDP tecrîdê giran verra rayverê Şarê Kurd Abdullah Ocalan’î kirêşt meclîsî. Parlamenterê Agirî yê HDP Berdan Ozturk’î ebi verniyazpers tecrîdî Serokwezîrê Tirkiye Davûtoglu rê pers kerd. Verniyazpers de vajiya ke, Girotxaneyê Îmrali, hetê Wezareta Edalet nê, hetê MGK yeno îdare kerdin. Verniyazpersî de niya vajiya:
* Zey her tepişte, çima Birêz Ocalan wayrê heqê ke qanûn de ca gênê niyo?
* Çi eleqeyê tecrîdo ke yeno ramiten, bi dewleta hiqûq esto?
* Sedemê tecrîdê giran, o ke dûstê hiqûqê netewî û mavênnetewî yo çiko?
* No tecrîd ebi îrade û qerarê dewlet yeno manîkerdin?
* Pawitoxê Birêz Ocalan’î, yê ke 27ê Tîrmeh 2011î ra na het muracat kenê, çima nêşkenê pêdiyayin virazê?
* Qûweto ke, dirûmê îstisnayî Girotxaneyê Îmrali de ferz keno, meşrûyetê xo kotra gêno?
* Gravê Îmrali hetê kamî û ebi kamcî statuyê qanûnî yeno îdare kerdin?
DÎHA/ENQERA