Rayberê Şarê Kurdî Abdullah Ocalan 19 serrî yo ke binê tecrîdêko giran de yo û no tecrîd çend serranê peyênan de xeylê giran bîyo û 11ê Êlula 2016î ra nata ti xebere Ocalanî ra nîna girewtiş. Vera tecrîdê giranî de kurd û dostê kurdan hertim payan ser o yî û hewl danî Rayberê xo ra xeberêk bigîrî. Nê çalakîyan ra yewe zî Çalakîya Ocalan rê Azadîye ya û 25ê Hezîrana 2012î ra nata bajarê Strasbourgî yê Fransa de vernîya awanîyanê Konseyê Ewropa û CPTyî de yena viraştiş a. Çalakîya ke nizdîyê 6 serrî yo dewam kena, her hewte hetê grûbêka cîyaye ra yena domnayîş. Çalakîye no hewte hetê endamê Înîsîyatîfê Cinîyan yê Hollanda ra ameye dewrgirewtiş. Grûbe de cinîyê bi nameyê Şohret Tosune, Hanim Şahîndale û Meral Sapane ca gênî. Endamê înîsîyatîfî dîyar kerdî ke ê reya hîrêyine ya ke nobete dewr gênî û vatî ‘Ganî Ocalan bireso azadîya xo’. Ser nameyê înîsîyatîfî wina ame vatiş: “Nobetê Azadîye çalakîyêka rûmetine ya. No seba kurdan wezîfeyêko pîroz o û ganî herkes wina hereket bikero. Ma 6 serrî yo ke seba Rayberîya xo çalakîye de yî. Ma veng danî herkesî ke wa wayîrê Rayberîya ma bivejyî.” ANF/STRASBOURG