Şaredarîya Şaristano Gird a Amedî xaye kena kena her taxa Amed de krêşêk akero. Şaredarî no qeyde wazena destê cinîyê ke xebetyenê rehet bikero. Nê krêşan de gedeyî pê ziwanê dayîka xo perwerde vînenê. Aşma sibate û nîsane de temelê her di krêşan amebi eştiş û înşaatê krêşan dewam keno.
Hetê Serekîya Daîreyê Karê Fenî yê Şaredarîya Şaristano Gird ra taxa 450 Banan û Baxcilar de krêşê ke 550 wendekar kapasîteyê yenê viraştiş. Yeno pawitiş ke nê Krêşî heta aşma citmenge de bêrê temamkerdiş. Nê krêşan ra yew taxa 450 Banan de cayêko 2678 metrekare ser de yeno viraştiş 250 wendekarî eşkenê tede ca bigêrê. Mîyanê krêşî de, honza xîzî, baxçeyê xoza û odeyê îlmî estî.. Di taxa Baxcilar de zî cayêko 2500 metrekare ser de krêşo ke 300 wendekarî eşkenê tede ca gênê yeno viraştiş.
Her di krêşan rê 2 mîlyon û 779 hezar mesref şino
Hetkarê Sekreterê pêroyî Abdullah Sevînç, derheqê her di krêşan de melumat da û îzeh kerd ke krêşê 450 Banan vera-vera qedîyeno û krêşo ke viraştişê ci aşma nîsane de dest pêkerdo zî aşma citmenge de qedîyeno. Sevînçî îzeh kerd ke berdêlê îhaleya nê krêşî 1 milyon û 274 hezar û 790 lîre yo.
Sevînçî îzeh kerd ke krêşê taxa Baxcilarî zî cayêko 2500 metrekare ser de yeno viraştiş û berdêlê ey zî 1 milyon û 525 hezar TL yo û wina vat, “Na proje vera-vera qedîyena. 300 wendekarî eşkenê nê krêşî ra îstîfade bikerê. Yeno pawitiş ke no krêş zî serê aşma îlone do biqedîyo. Ma nika ra tepîya semedo ke hûmara nê krêşan zêde bikê xebatanê xo domnenê.”
AMED