Emegdar û gurekarê perwerdeyî hayr antî polîtîkayanê dewleta tirk ya dûştê perwerdeyê bi ziwandê mayî ser û day zonayen ke heqê perwerdeyê bi ziwandê dadî nîno munaqeşekerdiş.
Dema perwerdeyê 2016-2017 emserr zî Tirkîye de bi polîtîkayanê înkar û asîmîlasyonî destpa kerd. Emegdaranê perwerde ke derheqê babed de qisey kerdî hayr antî rolê perwerdeyê bi ziwandê mayî ser. Serokê Şaxa Egîtîm Senî yê Îzmîrî Hasan Alî Kiliçî vist vîrî ke heqê perwerdeyê bi ziwandê mayî xêlê muhîm o aşkere kerd ke ê hetkarê perwerdeyê bê pere yê. Kiliçî peymanê mavênneteweyî yê ke Tirkîye zî îmze eşto binê ci vist vîrî û wina va: “Êndî her kes zî qebûl keno ke perwredeyê bi ziwandê dadî heqekê nîno munaqeşekerden o. Teberê Tirkîye û çend welatanê bînî, endî (hinî) heqê ziwanê mayî hetê her kesî qebûl vîneno.
Rîwalê waştena perwerdeyê bi zimandê mayî bî hedef
Serokê Şaxa Egîtîm Senî yê Îzmîrî Kiliçî aşkere kerd ke jû sebebê êrişanê dûştê azayanê Egîtîm Senî zî pawitişê heqê ziwanê mayî yo. Kiliçî va ‘ma zey Egîtîm Sen hetkarê perwerdeyê bi ziwandê dadî yê’ û wina dewam kerd: “Yanî ziwanê zey kurdî, erebî, suryanî, çerkezî ûsb. beno. Kamcî qom biwazo şena bi ziwandê xo perwerde bivîno. Çîyo ke kewno ser doşê dewlete ganî îmkanan akero.“
‘Tirkîye heqan binling kena
Hemseroka Şaxa KURDÎ-DER ê Îzmîrî Yildiz Yildirim zî hayr ant rolê ziwandê mayî ser û aşkere kerd ke ganî domanekê bi ziwan û kulturê xo pîl bibo. Yildirim vist vîrî ke Tirkîye de qasê 20 milyon kurd ciwîyenê û wina dewam kerd: “Eke domaneke kamîya ci virazîyo ganî bi ziwan û kulturê xo bîro pîlkerden. Doman malbat û çormeyê xo ra çimeyê kulturî gêno. Reyna mordem bi ziwanê dayika xo ser xo de vindeno.”
Yildiz Yildirim da zonayen ke ê bin banê KURDÎ-DER’î de perwerde zî danê û veng da malbatan ke domananê xo ebe ziwandê kurdî perwerde û pîl bikerê.
Rayveberê Komeleya Heqanê Mordeman (ÎHD) yê Îzmîrî Denîz Bayrak zî dîyar kerd ke o bi eslê xo laz o û perwerdeyê bi ziwandê maye paweno. Bayrakî vist vîrî ke perwerdeyê bi ziwandê mayî heqekê însanî yo û aşkere kerd ke sifte waştena şarê kurd û yê pêrokîn şaranê bînî ganî bîrê pêşwazey kerden. Denîz Bayrakî vist vîrî ke bi polîtîkayanê înkarî Tirkîye hiqûqa mavênnetewî binling kena.
DÎHA / ÎZMÎR