OHALo ke hetê îqtîdarê AKP û MHPyî ra amebî îlankerdiş, serrêk xo dima verda. Çarçeweya OHALî de bi hezaran sîyasetmedar, rojnameger, endamê partî, akademîsyen û kedkarî tewqîf bîyî. Bi hezaran kesî bi Qerarnameyê Hukmê Qanûnî (KHK) karî ra erzîyayî. Qereqol û zîndanan de muameleyê xirabî ameyî kerdiş û sewbîna xeylê bêhuqûqîyî ameyî kerdiş. Babete ser o Serekê Komeleya Heqê Merdiman ya Şûbeya Amedî û Hetkarê Serekê Pêroyî yê ÎHDyî Racî Bîlîcîyî qisey kerd.
Bîlîcîyî va ‘teşebusê derbe ra dima OHAL ame îlankerdiş û no zî bin nameyê vera derbe de têkoşîn de erzîya dewre’ û wina dewam kerd: “Hukmatî teşebusê derbe seba xo kerd firsend û bi KHKyan kesê ke ti eleqeyê xo derbe reyde çinêbî daxî eştî zîndan. Îqtîdaro sîyasî yê ke xo rê muxalîf dîyêne, hemînan tasfîye kerd. Dest ronîya milkanê televîzyonan ser de û rojnamegerî tepişîyayî. Hukmat şî tayînan ser de labelê heto bîn ra qet dest nêda tayînan ro. Nika pawitoxê heqê merdiman bi hawayo kêfî tepişte yî û bi ‘ajanî’ yenî sucdarkerdiş. Derbeyî bi kerdişanê OHALî nînî astengkerdiş. Bi no hawa mexdurîyetî zêde benî.”
Ganî pêvînayîşî destpê bikerî
Bîlîcîyî bale ant rayîrê vejîyayîşê kaosî ra û wina va: “Herême de operasyon û pêrodayîşî estî. Şima OHALî wedarnî, nêwedarnî zî çîk nêbedilîyeno. Ganî seba nêyî pêrodayîşî biqedyî. Reyna ganî Birêz Ocalanî reyde pêvînayîşî dest pêbikerî. Ganî tecrîd peynî bibo. Heto bîn ra ganî bivînî ke polîtîkayê tepiştiş û tewqîfkerdişî çareserî nêano. Ganî madeyê ke Peymana Heqê Merdiman ya Ewropa de derbaz benî, goreyê înan hereket bikerî.”
ANF/AMED