Seke yeno zanayîş ke rojnameger Omer Çelîk, Tunca Ogreten û Mahîr Kanatê ke 305 rojî verê tewqîf bîbî, vizêr vejîyayî mehkeme. Mehkeme de rojnameger Omer Çelîkî pawitişê xo kerd. Labelê wexto ke Çelîkî qala îşkenceyo ke wextê tepiştişî de raştê ci amebî kerd, serekê mehkemeye va ‘îşkence derbaz bike, bê beşar sucdarkerdişan’.
Çelîkî pawitişê xo de bi silamkerdişê herkesî dest pêkerd û bale ant muhîmîya ziwanê dayîke ser. Çelîkî wina va: “Ez wextê tepiştişî de raştê îşkenceyî ameya. Wina bî ke orteyê zimistanî de polîsan mi mîyanê vewre de vindarnayî. Hetta polîsan keyeyê mi de derheqê mi de mîyanê xo de munaqeşe kerdêne. Şînayêne aye şewe mi bikişî û sîlehêkî kişta mi de ronî. Raporo ke dîyabî mi zî ame vînîkerdiş.”
Çelîkî qiseykerdişê xo de qala zext û hêrişê ke çapemenîye ser de benî kerd û pawitişê xo de dezgehê ke wextê OHALî de ameyî padayîş, yew bi yewe hûmarite. Çelîkî dîyar kerd ke ê nêşênayêne vera nê neheqîyan de bêveng bimano û wina domna: “Îdîaname de suco esasî xeberê ke derheqê maîlê Wezîrê Enerjîyî de ameybî viraştiş o. Mi no het de ti kesî ra talîmat nêgirewt. Çîyêko ecêb o yo ke heta nika nê maîlî hetê ti kesî ra nêameyî zurekerdiş.”
Ez texmîn kena ke şima cewab zanî
Çelîkî qiseykerdişê xo de wina va: “Yeno zanayîş ke polîtîkayê bêçareserîyî ke serranê 90î de ameyî meşnayîş, bîyî sebebê çî. Ez Licê de ameya dinya û 35 serreyî ya. Ez o wext bîya şahid ke cayo ke ez tede ameya dinya senî ame veşnayîş û rijnayîş. Ez bi desan reyan bi gule û bombeyan ra rizgar bîya. Beno ke ez bi hawayo bişans ewro tîya de ya. Seba ke mi hende zor û zehmetîyî antî, ez ewro bîya rojnameger. Ez zî wazena persê ‘Heqîqeten şima nêzanî sucdarî kam î?’heyetê mehkeme ra bikera. Ez texmîn kena ke şima cewabê nê persî zanî. Cok ra ez tehlîye û beratê xo wazena.”
Dozgerî derheqê Çelîkî de tehlîye, labelê derheqê Ogreten û Kanatî de qerarê domîyayîşê tewqîfbîyayîşî waşt.
MA/STENBOL