KARWAN HEWRAM/HEWLER/ANF
Ewro Serrgêra 21. ya Dagîrbîyayîşê Hewlêrî yo. 31ê Tebaxa 1996î de Sedam Huseyîno ke bi qirkerdişanê Enfalî 182 hezar kurdî qetil kerdbîy, bi dawetê PDKyî top, tanq û sîlehanê giranan reyde kewtbî Hewlêr. No dagîrkerdiş sey ‘Îxanetê 31ê Tebaxe’ yeno zanayîş û PDK bi nê îxanetî parlamentoyo ke netîceyê têkoşînê 50 serran yê şarê başûrî awan bîbî, seba ke partîyêka bîne ya kurdan têk bîşêro, kerdbî qerargehê leşkeranê Sedamî. Yeno zanayîş ke YNK 1992 de bi operasyonêkî Hewlêr hêzê rejîmî ra pak kerdbî û o wext Hewlêr sey paytextê Başûrê Kurdistanî îlan kerdbî. Talabanîyî o wext aşkere kerdbî ke o do piştî bido planê girewtişê Kerkûkî.
Aşma tebaxe de Celal Talabanîyî operasyonê girewtişê Kerkûkî da destpêkerdiş. Talabanî bi hawayo rew zî aver şîyêne. Nêyî ver Serekê Pêroyî yê PDKyî Mesud Barzanîyî Sedam Huseyînî bi mektubêkê dawetê dagîrkerdişê Hewlêrî kerdbî. Barzanîyî mektuba xo de Sedamo ke qatilê 182 hezar kurdan o rê bi hawayo ‘Serekê mi’ xîtab kerdbî û wina vatbî: “Ti do bi aqil û serkewtişê xo mudaxaleyê Îranî yê Iraqî rê çareyêk bivînî. Ez to ra wazena ke ti îxanetê Celal Talabanîyî biqedênî.”
Na mektebe ra dima Sedamî 30 hezar leşkeran reyde kewt Hewlêr. Netîceyê pêrodayîşan de 450 kesî merdî û 200 kesî zî birîndar bîyî û bi seyan kesî zî birîndar bîyî. Barzanîyo ke ewro vano ‘Iraqî reyde çîyêko ma yo ortax nêmendo, ez do dewletêka xoser awan bikera’ ê wextî de îzehetê xo yê çapemenîye de wina vatêne: “Ma kurd îy, Ma Iraq îy. Beno ke mabênê ma û Iraqî de problemê şenikî bibîy. Labelê nuqtaya ma ya ortaxe pawitişê Iraqî ya. Seba ke Amerîka û Rojawan piştî nêda ma, ma hukmatê merkezî ra hetkarîye waşt.”O wext destê YNKyî de Hewlêr, parçeyêkê Helebçe, Ranya, Qeladizê, Herêma Qendîlî, Pencewînî û cayê bînî estbîy. Destê PDKyî de zî Duhok, Zaxo, Soran û parçeyêkê yê Helebçe estbîy. Labelê îxanetê 31ê tebaxe ra dima no bedilîya.