Derheqê babedî de, Dayika Şemîyan ra, Hanim Tosun, ke mêrdeyê xo Fehmî Tosun’î serrê 90’î de bi cînayetê kerdoxê ci nêdîyar vinî kerda, qisey kerd.
‘Cînayetê ‘kerdoxê ci nêdiyar’
Hanim Tosun ciresna ke serrê 90’î de merdimî bi wesayîtê torosê sipî ameynê qetilkerdiş û eyro zî merdimî bin nameyê qedexeya vejyayîşê teberî de yenî kiştiş û wina dewam kerd: “Beyntarî ra çend serrî vîyêrtî, hikumatî bedilyayî la zîhnîyetî heta nika qet nêbedilyayî. Ez zaf meraq kena rayberê dewlete çi wenî û çi şimenî? Zerre û çimê înan hende tarî bîyî ke ez zaf meraq kena ke wazenî çi bikî? Domanê Suleyman Demîrel û Bulent Ecevît ke serrê 90’î de zilmî ma kerdênê çinêbî la domanê serokwezîr û serekkomarê ewroyên estî. Serrê 90’î de bi torosê sipî û awayo nimite qetlîyamî ameynê kerdiş la eyro awayo akerde qetlîyamî yenî kerdiş. Verê cenîyî şînaynê şerî bidî vindarnayîş la eyro cenîyan zî qetil kenî.”
Tosun dergeyîya qalîkerdişê xo de ard ziwan ke eyro Kurdistanî de şar yeno qetilkerdiş û çewî ra veng nêvejyeno û wina peynî kerd: “Merdimî hende bêwijdan bîyî ke her kesî ra vanî terorîst la esil terorîst ê ke nê qetlîyaman virazenî yî. Hem merdiman qetil kenî û hem zî terorîst îlan kenî. Ez sey yew dayîk semedê heme kesê ke yenî qetilkerdiş xemgîn bena. Ma nêwazenî yew merdim daxî bimiro. Na hovîtî çi Israîlî de û çi zî Sûrîye de nêame kerdiş û bi no hawa nêşkenî ma biqedênî.”
JINHA/STENBOL